究竟啲花旗國銀行係咪雨過天晴？肯定唔係。
不過喺一個冇咗marktomarket嘅世界裏面，銀行條數真實有幾差，將會冇人知。如果冇人知，大家就可以扮冇事，扮雨過天晴繼續炒上。
講真，銀行係啲乜？咪係個錢入錢出嘅黑箱，希望最後有盈利咁解。唔同意孫柏文話銀行係黑箱嘅滙豐fan屎，唔該諗吓，你之前知唔知佢哋有個要上身嘅200億美元SIV？
點都好，大家可能會驚一旦黑箱被識穿，炒上動力就會冇咗。我只可以話，一個黑箱可以好耐都冇人識穿，睇吓馬多夫就知。
過到關就係英雄
馬多夫爆煲，係因為提款多過存款。其實如果冇人提款，馬多夫今日仲係過緊大富豪生活。銀行就一模一樣，所以除非有存戶擠提，啲銀行就可以繼續營業，用啲會計手段話自己大賺特賺！
就快要出第一季業績？啲銀行就話：「有機會做show啦！」都不知幾開心。
大家可能會話：「奧巴馬就係知啲銀行會勁屈會計制度機，所以就獨立地推出壓力測試。過到關就係英雄！起碼冇事。」
壓力測試嘅原意，係去睇究竟啲銀行喺更差嘅經濟環境下，頂唔頂得順。
避稅天堂咪譯錯
咁大家知唔知喺壓力測試中，假設09年最差嘅失業率有幾高？8.9%。
上個禮拜都已係8.5%，聰明嘅fan屎，你話啲銀行過到壓力測試係咪真係「冇事」？壓力測試已變笑話。
最後題外話。Taxhaven又唔係taxheaven，點解會被譯成「避稅天堂」？
孫柏文
http://phatdat.blogspot.com