社民連靠激烈抗爭手法喺政圈冒起，身為財委會主席嘅民主黨副主席劉慧卿更因此被鬧唔公平，認真委屈。不過，個性強悍嘅卿姐點會咁易被打殘？卿姐甚至偏向虎山行，預備嚟緊三個月走訪大中小學，甚至幼稚園巡迴演講，主題竟然係「衝擊議會文化」，真係唔辣唔食，唔怕講到掟蕉、掃場同粗口事件時又同社民連開片。
之不過唔係間間學校都好似卿姐咁大膽，據聞有小學想卿姐同學生分享感受，但又唔想講到粗口咁激嘅題材，所以建議改主題，希望卿姐將就一下。卿姐呢個巡迴show查實都係想年輕人關心吓社會，相信都會遷就到唔同學校嘅需要。
王永平自爆爛口
無論如何，粗口事件繼續係城中熱話，退任局長後經常議政嘅王永平噚日接受有線電視訪問時，自爆「爛口」。八方以為佢以前「真人不露相」，點知佢笑笑口話自己嘴角爛咗一忽啫，估唔到佢對搞爛gag都咁有心得。立法會前主席黃宏發就喺同一節目撐講粗口好平常，自己間唔中都講吓，但覺得議會始終係莊嚴地方，啲XYZ最好收埋一邊。