近排全球對於金融業高層嘅人工非常關注，今時今日嘅中國要同國際接軌，呢方面當然都要追上國際準則。
據內地傳媒《第一財經日報》報道，內地嘅金融機構高層，減薪並唔係自願咁簡單，而係財政部發「限薪令」要高層減薪。今年初財政部曾發《金融類國有及國有控股企業負責人薪酬管理辦法》，但就冇講明具體要求，報道引述知情人士話，今次只係令通知嘅指示更加具體。
消息人士又話，高層薪酬唔止要同業績掛鈎，仲同08年國內經濟有關，令華華再次感受到有中國特色嘅社會主義。根據年報，交行（3328）、中行（3988）、工行（1398）、建行（939）、國壽（2628）等主要負責人，08年年薪比07年減逾一成，而4家銀行08年業績都有增長，但高層照樣減薪。至於三保中已公佈業績嘅國壽，盈利跌64%，董事長楊超薪酬減15%，高層減幅亦多過4行。