鬍鬚曾係習武之人，呢一點佢已經講過N咁多次。佢噚日喺網誌上繼續「耀武揚威」，自爆佢師公林祖年輕時，由叔叔即係黃飛鴻徒弟林世榮收養，言下之意唔知係咪話畀人知，佢都同黃飛鴻有少少淵源？
除咗習武，鬍鬚曾嘅林師公仲行醫，懸壺濟世，而且桃李滿門，門生遍佈英、美同荷蘭等地。鬍鬚曾嘅師父鄺鐵夫係林祖嘅愛徒之一，個幾月前林祖喺香港擺百歲大壽，就有港、澳、台、歐美，甚至非洲嘅徒子徒孫現身，盛況空前，鬍鬚曾都有親身去拜壽。
唔知係咪一直習武健身嘅關係，鬍鬚曾話覺得師公嘅黑髮比自己仲多；近來擔心預算案未必可以喺立法會通過嘅鬍鬚曾，難道因此而白髮激增？