謝天華憑劇集《學警狙擊》中Laughing哥一角成為大紅人，陳志雲日前更送上一份電影合約，由天華擔正主角。日前天華接受港台節目《舊日的足跡》錄音訪問，佢話從冇諗過Laughing呢個角色會有咁多人鍾意，亦冇諗過可以憑呢個角色成為電影男主角。
天華提到當年風火海解散後，試過有9個月冇工作冇收入，要問經理人公司借錢度日，直至有人搵佢參演電影《古惑仔》，先至解決經濟上嘅問題。
早前天華因為醉駕被判停牌，好彩唔使坐監，家要事事小心，佢話：「過馬路要等綠燈，又唔可以丟垃圾，事事都要好小心，同埋發生醉駕呢件事，初時我唔係覺得好嚴重，仲覺得新聞炒作炒大件事。事後諗番真係會影響到人，家我冇得揸車反而飲少咗，唔再追酒飲，只求有開心感覺。」
未想生BB
對於前拍檔陳小春話天華應該食齋戒酒，天華講笑話小春應該食長齋，因為佢見親記者都好火爆。天華又話事業啱啱先站穩陣腳，所以現時未考慮生小朋友，因為想放多啲時間喺工作上喎！