禾夫斯堡前晚喺德甲主場大勝拜仁慕尼黑5:1上榜首，奪標賠率得2.7倍（大熱門係2.35倍嘅拜仁），我求大俠唔敢講馬加夫一定幫到「狼堡」攞德甲，但肯定佢可以為「狼堡」大賺一筆。點解？「狼堡」打得咁好，球員嘅身價都炒起晒，淨係米斯域莫、迪施高同加菲迪加埋就值3,000萬歐元啦！
加菲迪同迪施高都係馬加夫喺07年6月上任後買返嚟，前者喺法甲勒芒過嚟要成750萬歐元，而簽自塔比歷斯嘅迪施高就只係400萬歐元。
加菲迪入金球身價飆
加菲迪上季德甲已展示射手本色，24場入12球，今季仲勁，17場入20球，其中前晚對拜仁射入5:1嗰球，可說係今季德甲嘅金球，事關佢扭過拜仁兩個守衞同龍門雲昇後再用後踭射入空門。佢賽後咁話：「呢球係我一生中入得最靚嘅一球。」馬加夫則話：「呢啲波一生人只有一次。」由於佢年紀唔細，有成30歲，升值潛力較細，但據德國傳媒都估佢現值950萬歐元。
至於喺今季德甲24場入15球嘅波斯尼亞前鋒迪施高得嗰23歲，故身價已暴漲至1,000萬歐元。另外，去夏由紐倫堡以400萬歐元加盟、負責喺中場穿針引線（喺25場聯賽入6球同有16次助攻）嘅26歲球員米斯莫域，身價亦升到900萬歐元。
雖則「狼堡」班球員個個貴晒，但講真，就算迪施高嘅身價炒到成1,000萬歐元，對富甲一方嘅英超球會，簡直唔算係乜嘢錢。德甲中小型球會向來係將啲球員平買貴賣，若然喺今個夏天有價有市，「狼堡」肯定會甩咗米斯域莫、迪施高同埋加菲迪套現，再執過啲新球員返嚟炒過。
