《大冬瓜》才剛播完，但陳錦鴻的人生卻因兩歲囝囝駕樺而剛起步。問到很多父親，大部份都話湊仔或教仔主力落在太太身上，自己則在「大事」上作決定。但陳錦鴻就話囝囝的教育或生活事，統統都主力由他話事。「如果佢係女仔，我一定交由太太教唔會參與。太太揀得我做老公，即證明我性格一切都好好，所以由我教仔包佢放心。」
記者：林佩婷
攝影：梁細權
古文作胎教
觀乎錦鴻的教仔經，確有自己一套。好像人人胎教聽音樂，他就選擇古文經書。「我會讀道德經、三字經同論語等畀佢聽，因為聲音都可以刺激胎兒腦部活動，我覺得佢嗰刻已經好有思想，應該都傳授知識畀佢。讀經書、佛經呢啲大智慧嘅書係好有用，所以我每日大約讀半個鐘頭。」
親自下廚為妻兒
由太太懷孕到現時囝囝膳食，他都給予不少意見，只要放假，便擔任家中大廚一職。「我信中醫，太太懷孕嗰陣每隔個半月就把脈一次，至於食療，參考中醫、長輩、甚至街市檔主等意見，我知想小朋友大隻就要飲多啲牛骨湯，魚湯我就專揀海魚，好似牛鰍、大眼雞。到囝囝出世，我就請3個月假陪太太，親自買餸下廚仲負責餵埋佢食，呢啲係因為我鍾意做先做，唔係責任問題。好似太太生仔後我特登請工人，就係話畀老婆知佢可以出番去做嘢，唔鍾意湊仔完全無問題一樣。」
錦鴻也確有自己一套教仔法，同兩歲囝囝溝通也以成人語氣對話。「根本細路仔好多時都識聽你講咩，又或者當佢同其他小朋友推撞時，如果唔危險我會由佢自己經歷，因為將來社會都會係咁。」
名字有玄機
兒子駕樺的名字，是他特地請老師改的，蘊含深意。「樺樹皮因為有堅韌植物纖維，可以做成拉船嘅繩。我希望囝囝嘅堅忍可以凌駕樺樹皮，可以忍耐而且唔易氣餒。」
也不負所望，駕樺性格的確超獨立，一般小朋友愛撒嬌扭抱，他都不會，性格甚至可以說是小心。「佢8、9個月大已經自己扶住椅或踎低學行，直到學識行都無俾人扶過。你要拖，佢都唔制。而且，佢唔鍾意模仿人哋嘅行為，你講咩佢唔會照做，可能因為咁佢學嘢比較慢。最特別係佢個人真係好小心，好似小朋友好鍾意食嘢，但佢反而好難習慣一種新食物，要慢慢試到啱為止，所以唔怕佢食得糖多，因為佢會吐番出嚟唔食。又或者見到陌生人，第一個反應係無表情，要認清個樣先識笑。」
