早排座頭鯨訪港，掀起鯨魚熱。亞視趁熱鬧，近日播出預告片，宣傳噚晚8點出街嘅旅遊飲食節目《豪遊天下》，但主持人黃麗梅唔係介紹點樣保護鯨魚，而係喺日本街頭食鯨魚肉，仲要七情上面大嗌好食，激起環保團體炮轟，勁鬧亞視變相鼓吹殺害受保護動物。亞視同麗梅姐喺公眾壓力下，噚日終於刪走段片。
預告食鯨魚狂收投訴
《豪遊天下》係包拍節目，即係亞視外判畀黃麗梅間公司製作，噚晚播出最後一集。早排預告片出街，重點推介麗梅姐食鯨魚刺身，片中見佢將塊刺身放入口之後，用一貫浮誇嘅演繹方式，好驚為天人咁大嗌：「好多油、好食呀。」
段片出街後，立即引起網民同環保團體炮轟，截至上周末廣管局已收到8宗投訴。世界自然基金會香港分會指出，鯨魚係受保護動物，除咗日本同挪威，全球都禁止捕鯨同鯨魚貿易，但每年仍有過千條鯨魚被殺。環保觸覺亦強烈譴責亞視，因為觀眾去旅行時會參考旅遊節目嘅介紹，主持喺節目中大讚鯨魚好食，即係鼓吹人食鯨魚；眾所周知日本經常藉科學捕鯨為名，濫捕鯨魚，傳媒唔應該做幫兇。
黃麗梅日前仲辯解，話拍攝當日喺九州食鯨魚肉，係因為當地旅遊局推介，而且喺日本食鯨魚肉係合法；不過唔少網民唔收貨，仲話如果亞視唔抽起呢段片，會杯葛亞視同贊助商李錦記嘅產品。八方問過李錦記嗰邊，佢哋好關注件事，收到投訴後，第一時間轉介畀亞視跟進。
為平息眾怒，黃麗梅噚日嗱嗱臨返亞視，將食鯨魚肉嘅分幾鐘片段刪剪，仲話：「為免令觀眾不安，我亦尊重大家愛護動物，今日立即返公司處理夜晚播出嘅畫面，將介紹鯨魚肉嘅全部片段剪走。」
曾吃娃娃魚同樣抽片
亞視製作行政及統籌副總裁葉家寶亦話，同黃麗梅商量過後，大家都唔想引起反對聲音，所以決定刪咗段片。佢仲話，以前黃麗梅試過食娃娃魚，都考慮到娃娃魚係國寶，所以亦抽起段片。
今時今日，大眾傳媒冇保育意識好易出事，唔好講話食鯨魚，飲食節目介紹食野味，時裝節目推介着皮草，都隨時惹公憤。
mailto:[email protected]