今日去泰國拍廣告的琦琦，早前在北京為首飾品牌拍廣告，她笑言與相機談戀愛，越拍越high，連拍十多個小時，更deepV上陣及以冷傲男裝示人，出來效果有點像瑪蓮德烈治。琦琦為求以最佳狀態示人，更以秘方一日一沙田柚減肥，火速減去6、7磅。
名模琦琦早前為首飾品牌Artini拍攝新廣告，之前在香港、巴黎等地取景後，新季搞搞新意移師北京拍攝，並找來中國著名攝影師馮海和中國設計師設計服裝等。
越拍越興奮
廣告中琦琦有六十年代復古味的bob頭女郎、unisex男裝造型，以及爆炸頭性感女郎裝扮等，她透露已由原定的20個造型，濃縮成海洋女神、民族風和中性型格等4個主題，她說：「攝影師馮海好多年前幫我影過一輯好似阮玲玉風格嘅相，佢嘅作品有啲藝術味道，唔係好商業。」
琦琦續說：「今次第二次合作，佢一直想我着男裝，咁模特兒應該畀人有新鮮感。出嚟效果幾好，佢哋仲話有啲似MarleneDietrich（瑪蓮德烈治），冷冷、孤傲嘅氣質，好開心。」
原先大隊計劃收工一齊吃晚飯，豈料越影越high，連改4個妝，影足十多個小時，拍攝完畢後已到吃早餐的時間，琦琦說：「撞到好嘅攝影師，好似同部camera談情說愛咁，好投入，越拍越興奮，完全停唔到。」
晚餐吃七成
為拍攝這廣告，琦琦刻意減肥，她說：「聖誕、新年連住幾個假期狂食，又去日本食和牛，肥咗6、7磅，要拍廣告都減少少。早餐食多啲，晚餐食7成，我有一個秘方好好，萬試萬靈，好快減到磅，就係每餐食完之後，食少少碌柚，一日食足一個，好快見效。」
採訪：DebbieLum