華華有個平時執起本書都懶嘅朋友港女Q，突然同我話要去讀MBA。我聽到就話：「平時開口埋口都係講點樣媾鬼仔嘅你，去讀書？」
佢咪咪嘴笑住答：「其實都係為媾仔。仲要係法國仔。」
華華：「咁係咪要去歐洲讀？例如去Insead？」
讀住MBA過日辰
港女Q：「唔使！係喺香港啲大學讀。」
港女Q解釋，原來好多法國金融機構，喺金融海嘯下冇生意。幾年前派駐香港嘅青年才俊日日返工玩手指、冇嘢做。
不過因法國嘅勞工法例好苛刻，炒人成本非常高，所以就算冇嘢做都唔炒人。一旦炒人，分分鐘會將「工人綁架上司」呢個優良法國傳統喺香港發揚光大，到時你話點算？
吸港女報名埋身
咁點解唔調佢哋返法國？原來公司暫時冇budget，唔調平過調，所以呢班青年才俊就咁滯留咗喺香港。佢哋橫掂都冇嘢搞，所以就搵啲嘢過吓日辰，做MBA學生之意不在讀書。
朋友港女Q，一知道有咁多法國青年才俊將會聚首一堂，當然即刻報名。
講真，原來港女對啲男仔嘅要求唔係好高，「雙失」都冇問題。因為就算冇嘢做、冇得返鄉下都OK，最緊要你有糧出、有學返咪得囉！
投行精神：有奶便是娘
幾日前，華華同歐資賓架M食飯。佢間行早排就被該國政府大舉入股，管理層大執位，睇落連邊個係話事人都唔知。
華華問：「你母公司立立亂，總部聽聞日日都有啲話事級嘅人要起身。有冇總部嘅人想趁火打劫，奪權管埋你哋？」
M：「唔好話亂世，風平浪靜都有人玩嘢，指指點點啦。不過以前初入行時，就有個鬼佬前輩教落，做得投行人，返工時淨係使聽一個人支笛。」
M：「做投行，淨係使聽年尾決定你有幾多花紅嘅人支笛就得。咩orgchart（公司架構圖）、title（職級銜頭），全部唔使理冇得決定我花紅嘅，我睬你都儍。有得決定嘅就係我老細！」
估唔到鬼佬前輩連我哋中國人呢句「有奶便是娘」都識，勁。
李華華
mailto:[email protected]