經濟不景，歌手藝人紛紛另謀搵銀方法，保障收入。對歌手來說最快的套現方法就是賣二手衫，在雷頌德好友的統籌下，Once二手店應運而生，鄧麗欣（Stephy）更率先拿出12件服飾做試金石，若反應理想她更有意拉攏幾位好姊妹傅穎和吳雨霏等開設二手衫店，實行齊齊榮升老闆娘。
現時經濟市道欠佳，歌手藝人工作量相對減少，就連酬金也不時被壓價，圈中人皆另覓新搵錢途徑來保障收入，對於鄧麗欣這些活躍於歌影視圈的藝人，最快捷及方便的套現方法就必定是賣二手衫。
唔怕歌迷意淫
適逢雷頌德（Mark）的好友Billy將於明日起至5月底，在尖沙嘴開設Once二手店，所以Stephy以及一班金牌大風旗下歌手如傅穎、方力申和吳雨霏等，紛紛出力支持，連阿Mark好友陳慧琳也拿出200件舊衫，陣容認真犀利。不過整間二手店以阿Mark的服飾最多，佔全場5成，多達500件，當中更有不少是限量貨品。
日前Stephy率先拿了12件心愛服飾到場，更親力親為幫手整理衣物，當中以一件D&G黑色漆皮中褸最為吸引，她推介說：「呢件褸原價要成40,000蚊，家就只係賣5,000蚊，真係好抵，而且我仲只係着過一次咋。」她笑言幾經掙扎才忍痛割愛拿出舊衣來賣，又稱不擔心男歌迷會買舊衫來「索」，她笑說：「最好佢哋買多啲，我都唔介意佢哋索，因為我會洗乾淨晒先拿出來，所以一定冇味道。」
考慮自行開舖
Stephy雖然暫時只拿出12件衣物來賣，但之後會再加添，更視今次賣二手衫為試金石，她說：「其實賣二手衫對我嚟講真係一舉幾得，一來將舊衫套現後又可以再買新衫，二來可以清理一下屋企擠逼嘅衣帽間，加上我一直都好想同埋幾個女仔，好似傅穎、吳雨霏佢哋一齊開間二手衫店，以前我哋一路都有講過，但就一直未有實行，如果今次反應好嘅話，我就會好好計劃一下。」
此外，Stephy前晚到又一城出席日本品牌HystericGlamour活動，與設計師北村信彥合照，穿上短褲騷腿的她，表示近日狂做運動令patpat堅挺，但卻很痠痛。問她是否不滿意自己的坐圍？她說：「年紀大，敵唔過地心吸力。」
採訪：駱華齡、梁錦雯
攝影：葉君海
Once地址：尖沙嘴新港中心101室
必搶雷頌德衣物
陳慧琳名牌靚衫
