敏妮喺啱啱過咗嘅周末，同一位冇見超過10年嘅朋友食飯。呢位朋友一直都喺潮流雜誌做嘢，以前只係識追趕潮流，但隨着年紀漸長，佢開始投資。喺投資市場裏面，敏妮好少見有人唔使「交學費」，呢位多年唔見嘅朋友當然亦交咗唔少學費。
聽股評人推介買股票
朋友呻：「敏妮，我唔識炒股，所以唔敢亂炒，買嘅股票都係好穩陣嘅股，好似滙控（005）、宏利（945）。」聽到呢到，敏妮已經心知不妙，再計一計佢嘅股齡，果然不出所料，佢喺06、07年開始投資，而且喺滙控、宏利成為「紅底股」時買入。敏妮係清明節同佢食晚飯，見佢講完自己個portfolio，唔知以為佢拜完山、同先人傾完偈，所以好大感觸。
佢話得閒會將自己整個portfolio執好，sent畀敏妮幫佢諗吓有冇辦法救番。
其實喺金融海嘯之下，輸錢好難避免，但最令佢失望嘅，反而係佢信賴嘅股評人喺關鍵時刻冇立場。話說佢知道自己「股齡」淺，所以認定一位已達「神」級嘅股評人做跟隨對象，交月費都係為咗睇呢位股評人嘅股評，當然佢之所以買入滙控同宏利，都係聽股評人推介。
股神難接受自己錯誤
問題係，自從金融海嘯之後，佢話呢位股評人嘅報告開始變得好「頹」，對於佢曾經推介過嘅滙控要供股，敏妮朋友好想知股評人有乜意見，但喺佢嘅報告裏面，並冇提供任何立場，令到敏妮朋友好失望。
金融海嘯百年一遇，睇錯方向揀錯股票係人之常情，但對於被譽為「神」嘅股評人嚟講，可唔可以接受凡人嘅錯誤又係另一回事。
溫敏妮
http://wanmanli.com/blogs/