上周六同青蛙仔合作，我推介嘅3場冷門全中，包括重心嘅塞爾維亞贏羅馬尼亞，保加利亞頂得住愛爾蘭開1:1和波，連彼德堡10倍嘅2:0波膽都中埋。成績唔錯，今期同老友石兄夾檔，希望再扑中幾條冷嘢。
話明本欄玩扒冷，要兩場客隊開「半勝」一啲都唔過份，懶理全場戰果。首先，卡坦尼亞呢班波近期踢得好順。再睇「半場主客和」成績，卡坦尼亞近6場入面，有5場開「半勝」，試過半場已領先烏甸尼斯、巴勒莫同基爾禾，咁啱3場都係作客。今場作客卡利亞里咋嘛，4.7倍「半勝」點解唔博？
博洛尼亞「半勝」仲和味
再嚟要博洛尼亞，都係揀半場領先主隊羅馬，開7倍「半勝」。羅馬自從歐聯出局後未好過，其一原因當然係傷兵滿營，又間唔中有主力停賽，國際賽前就大敗1:4畀祖雲達斯，而佢哋近8場都試過有4場半場落後對手。博洛尼亞喺3月中，作客祖記就開過「半勝」，7倍夠分頭啫，2串3串卡坦尼亞「半勝」，一試無妨。
葡超一向都係畢傑覺得水準好低嘅聯賽，要波圖、士砵亭同賓菲加佢哋主場輸波就較難啫，假如作客就有得諗囉。歷索斯首循環作客都贏過士砵亭，今次主場再對，4.2倍W可以再試，開埋9倍「和/主」。文：畢傑