中央政策組首席顧問劉兆佳退休，唔係告別CPU，而係喺中大榮休。大家可能唔記得，當年老董搵佳叔由馬料水出仕中環，佳叔一直以「請假」形式去政府總部返工，只保留榮譽教授銜。江湖傳聞呢個「假期」本應07年結束，即係同老董共進退，不過中途有人腳痛落台，煲呔又等人用，佳叔就繼續「放假」至今。
呢個悠長假期終於放完，佳叔今年正式喺中大退休，社會學系今個月底舉行榮休晚宴，同時恭賀佳叔同李沛良教授榮休。有中大人士指出，由於佳叔仍有正職在身，相信佢暫時冇乜時間返中大客串授課。此外，下學期過檔港大嘅社會學系教授呂大樂，據講中大同僚已farewell佢。