57年前，《地球停轉日》首次上映；57年後，新版《地球停轉日》變成荷李活大片！電腦特技造就空前盛大場面，加埋奇洛李維斯又點可以唔捧場？論畫質！屋企套架生靚的話，應該可以睇到比戲院更仔細嘅畫面；dtsHDMA5.1聲效表現，硬要同頂級靚聲BD相比，就稍嫌震撼感不足，是一個小小缺失。
記者：許福合
聲唔襯畫
睇戲自然要聽埋聲，今次BD版支援dtsHDMA5.1，想聽到子彈圍住飛嘅音效當然不會失望；不過相對一啲頂級BD靚聲天碟，《地》嘅音效顯然唔及電腦特技咁出色，遇到大場面音效唔夠震撼，感覺有啲畫面、聲音唔平衡。
古仔描寫手法亦要彈一彈，好多人睇完都覺悶，可能劇中訊息太有深度、太有哲學意味，要理解真係相當不容易，最後不得不自認比較膚淺，還好仲有巨星奇洛李維斯睇睇，加埋頂級畫面特技，BD版總可以煲一下。
外星警告
若只睇戲名，有人可能會誤會《地球停轉日》係《明日之後》一類滅世電影！主角奇洛李維斯自然係戲中焦點，戲中飾演外星高智慧型生命，帶住一個重型武器拍檔嚟到地球，但不要誤會，他無侵略意思，反之要傳遞一個危險訊息，如果地球持續發展破壞性武器，將會令宇宙中熱愛和平的外星人產生敵意，甚至將我們消滅。奇洛來到地球一邊了解地球人的一切，與地球人交流，最後竟然在林肯紀念堂找到解救人類的方法。
8千萬製作費
荷李活大片如何重視特技？新舊《地球停轉日》可以睇到。1951年舊片，當時畫面特技製作員只有5人，電影的製作費亦只有96萬美元，不過當2008年重拍版，製作費勁升至8,000萬美元，動用特技人員高達350人，認真誇張！
睇BD版時更可以見到，電腦特效做得幾有真實感，有好幾幕甚至比喺戲院睇時更逼真；最深印象係兩幕大破壞，整個美式足球場在幾秒內夷為平地，睇住電視內瓦礫、沙塵亂飛，幾可亂真。
另一個在紐約中央公園，來自外星巨球降臨一刻，雖然環境勁黑，但絕對唔會黑到無嘢睇，Noise唔多，BD版就有呢度好，睇多好多嘢！
地球停轉日
Blu-ray$239
DVD$129
VCD$55
