主持了三年《志雲飯局》，陳志雲學懂說話的藝術。是藝術也是偽術。
「真話假話都唔重要，一樣學到嘢，例如點解你覺得唔夠真？」月中舉行的《志雲飯局》舞台版，陳總讓觀眾投票決定是否相信嘉賓深情告白。
有幸與志雲大師飯局。清水兩杯，談愛情談親情，內容清如水。離座前驀地發現，真假並不重要，最重要是聆聽。你得想想，飯局上得着了甚麼。
撰文：吳佩思
由本月27日起一連三日上演的《志雲飯局》舞台版，每場五位嘉賓，有單獨對談，有小組會議。討論話題由娛樂圈到社會焦點大事都有。既名為飯局，當然有佳餚助興，名廚尹達剛即席烹調撚手名菜。觀眾既可向嘉賓發問，還能投票決定嘉賓說的話，你信，還是不信。
「啲人成日問我，你信唔信嘉賓講真話？與其問我，不如你自己問番佢。」
跟陳志雲談愛情。有關內容讀者也可投票決定信不信。
陳志雲說，從沒正式拍過拖。講斷背疑雲，他曾答得很玄：「你當我係基嘅，冇男人埋到我身；你當我唔係基嘅，亦都冇女人黐過埋嚟。」不是不懂愛情，只是他太愛自己。
藝人多拍拖助入戲
「過咗50歲，已經唔會諗呢啲嘢。咁有人陪行百貨公司梗係好，但未必開心喎，例如你想睇A，佢就話想睇B，明明有30分鐘可以慢慢睇A嘅，家得番15分鐘睇A，其餘15分鐘要陪佢睇B；又唔可以好似旅行團咁，約定30分鐘之後喺門口集合。或者我未遇到一個完全為我犧牲嘅人，所以我都唔需要犧牲。」
聞說陳總禁止愛將如鄧健泓和崔建邦拍拖，陳志雲輕輕將界線拉低：「其實我好贊成藝人拍拖，多啲生活經驗，做戲會更投入。但會勸佢哋。年輕人成日換畫好正常，但換咗係藝人，其他人就會標籤你，話你係『媾女王』、『女王』，所以拍拖都係低調啲好，到時要飛人換畫都容易啲。」愛將崔建邦情史一籮籮，形象一度急挫，最近終於浪子回頭與唐詩詠復合，挽回形象，陳總應記一功。
失去母親學懂珍惜
除了是愛情專家，陳志雲還是演說家，話題從不間斷，一失神就跟不上，考驗記者的聆聽能力，這也正是舞台版《志雲飯局》的主題。三年來百多個飯局，陳志雲一直在學習聆聽，真話假話都有值得學習的地方。
聆聽往往能救人一命，生命熱線即是一例，而今次演出是為生命熱線的生命之友籌款。現今世代，太多人只會放大自己的不開心，卻不懂珍惜生命，但陳志雲經歷過失去，所以明白珍惜，他說：「之前媽媽已經試過心臟病發，後來我去咗英國，有次佢心臟病發，但唔肯去醫院，我好內疚，如果我唔係接受被派去英國，媽媽就會救得番。不過天主令我明白生死有命，如果媽媽係愛我，就唔會想我生活喺內疚之中。正因為人嘅生命係有限，所以更加要珍惜。」
求助天主從不絕望
05年，父親也走了。「爸爸患肺癌，得番六個月命，喺呢件事上面，我反而由死亡睇到正面意義。爸爸好熟聖經，但佢一直唔信教，同佢講道，佢聽咗一陣就唔肯再聽，我都唔敢問佢肯唔肯受洗，好似提醒佢會離開咁。我一直為呢件事祈禱。臨走前三日，我朋友問爸爸肯唔肯受洗，爸爸話願意，即刻幫佢洗禮。之前我仲以為天主唔聽我禱告。」天主也會聆聽凡人的禱告，所以，做人總不能太絕望。
攝影：陳俊強
髮型：MichaelLamofTONI&GUY
化妝：GaryCheung
場地：Zeffirino（富豪九龍酒店）
斥互聯網一味靠惡
網民在互聯網力量無遠弗屆，可以決人生死。陳志雲說：「家就係意見太多，事實太少。你應該畀事實我睇，等我再分辨你嘅意見，最危險係將你嘅意見化成我嘅意見。」
讚俞琤夠包容
社會充滿負能量，傳媒有責。「每朝開收音機就聽到時事評論員喺度鬧政府，係咪真係冇嘢值得讚呢？係咪你講嘅嘢一定啱呢？你咁叻，不如你做啦。」他又以前上司俞琤為例：「佢係好包容嘅人，一有新諗法就會同下屬講，等你攻擊佢，然後佢會游說你接受佢嘅想法，當你俾佢說服後，佢又會話其實你個point都好好喎。成個辯證過程最重要係放低自己嘅成見，用耳去聽，可惜家啲年輕人未聽你講完已經駁嘴。」
飯局花絮：最難忘男人眼淚
陳志雲曾笑說做《志雲飯局》，最想訪問的對象是韋家晴（當年陳志雲任職電台時的藝名）。今天再問他，他笑道：「家最想訪問陳志雲，我就嚟51歲喇，我媽媽65歲過身，如果我同佢一樣，即係仲有15年命，家成日反思緊自己。究竟我會留低乜嘢喺呢個世界？我想其他人點睇我呢？」
曾訪問逾百位嘉賓，當中最難忘不是受訪者爆內幕，而是男人的眼淚。
陳慧琳
問一句答一句，你問佢：「男朋友對你好唔好呀？」佢答：「好呀！」好似落口供咁，唔係《志雲飯局》，而係《志雲警局》。
曾志偉
平時笑口噬噬，我問佢有邊幾個紅顏知己，佢數到第三個突然喊起上嚟，因為諗起阿梅（梅艷芳），我都束手無策。
王維基
喺亞視嘅日子，我相信對佢嚟講係個好大打擊，有好多事想做但做唔到。但有啲失原來係得，令佢發現對仔女係咁了解自己，一講到小朋友佢就忍唔住喊。
苗僑偉
三哥一講到翁美玲就喊，真係一對好有情義嘅朋友。
陳玉蓮
答得最少，佢好坦白咁同你講唔願意答你問題，佢講得最多就係：「錄完先講。」
鍾欣桐
我知道第一part講陳冠希，所以我請廚師送上第一道菜之後，唔好返入嚟，唔好打擾我哋嘅情緒。點知開始冇耐，就聽到一把聲嗌，阿嬌、阿嬌。阿嬌冇理，繼續傾，點知Mani（霍汶希）仍然繼續嗌，令我哋分神，結果我叫停。（有冇拍枱？）唔係好記得喇，好似有啩。
．飯局粒粒星．
