退休天文台台長林超英噚日最後一次以官員身份發表《香港家書》，回顧喺天文台工作35年往事，佢話最深感受係天有不測之風雲，受市民責罵同輿論批評，似乎係喺天文台工作嘅宿命。
雖然成日俾人鬧，林超英都有自豪嘅事，90年代初佢提議以顏色表達暴雨情況，即係紅雨、黑雨警告制度，之後又引入寒冷天氣、酷熱天氣警告。佢話兩個制度都以簡單易明訊息去通知市民天氣變化，更重要係促進咗社會關注弱勢社群，例如露宿者、獨居長者同長期病患者，喺天氣驟變時嘅苦況。
臨別贈言，林超英最後懇請市民明白天文台工作非常困難，偶然出現「不測之風雲」測錯天氣，要大家多啲包容同諒解。