煲呔自己閂埋門搞嘅經機會重提中藥港、教育港、醫療港建議，施政「老董化」迹象越嚟越明顯。歷史話畀我哋知，歷史係不斷重演嘅，以史為鑑，遲啲可能又有幾十萬人上街，之後，就輪到有人頭暈身㷫，隻腳有事……
童言無忌望身體健康
煲呔健康狀況唔止大人關心，連小朋友都好緊張。噚日兒童節，新地旗下商場大埔超級城叫班細路上書領導人，寫出對領導人期望。童言無忌，八方睇過部份細路心聲，見到有個12歲小朋友陳佩琪，希望煲呔身體健康，因為擁有健康體魄，先可以給香港更美好未來。
政界屢傳篤煲呔背脊耳語，八方卻唔多聽聞煲呔有病痛小道消息，小朋友祝佢身體健康，相信唔使學紅衞兵高呼毛主席萬壽無疆、萬歲萬歲萬萬歲咁肉麻啩！另一個小朋友何昊仁今年13歲，佢話會以煲呔做榜樣，努力讀書日後為市民效力。
八方奉勸小朋友千祈咪好學唔好，學煲呔「鬥噏」。講到為市民效力，讀書固然重要，唔識得走位亦枉然，最好同民建聯、智經埋堆，輕易就月入十幾廿萬做副局長、政治助理，黐埋泛民度就唔慌有運行。呢啲嘢，八方相信爹哋媽咪會教精你哋。
叫領導人繼續撐香港
香港哋為人父母甚艱難，搵夠400萬養大仔女已經唔容易，仲要面對裁員減薪，真係好難頂。11歲嘅梓楊嘅父母唔知係咪從事金融業，令佢好擔心父母冇得撈，所以對中央開綠燈支持上海10年內成為國際金融中心好擔憂，佢上書國家主席胡錦濤，要求領導人繼續撐香港，協助香港進一步成為亞洲國際金融中心。
睇到梓楊一片赤子之心，懇求阿爺千萬要照住香港，八方不禁心頭一酸，感慨莫名。兒童節應該無憂無慮慶祝，今日玩完明天會更好，點解香港細路仔睇到嘅香港，卻係夕陽西下前景不明，唔靠阿爺幫忙就唔掂呢？
呢幾年一眾闊佬、大孖沙北上攞着數無寶不落，特首每次上京都等派糖，如果煲呔空手而回，成個社會震驚，大人慣咗向北京伸手，難怪細路有樣學樣。長此下去，香港會變成點，八方不敢想像。
mailto:[email protected]