呢排天氣濕，搞到周身唔聚財，早幾日開機洗衫，唔覺意掹開機門嘅膠邊，睇到入邊積晒霉菌同發出異味，真係嚇咗一跳。部機買咗幾個月，咁快發晒霉，用刷擦極都擦唔甩，咪搵消委會老友求救囉。
老友話，每次洗衫啲水會積喺膠槽入面，如果冇用軟布擦乾膠邊，同打開機門風乾先關好，好容易發霉。可以試吓用布或牙刷，沾啲酒精或者稀釋嘅漂白水輕力將霉菌抹擦。
發霉致越洗越污糟
佢仲話，洗衣機要定期「洗白白」，大約每月一次，否則啲衫會越洗越污糟。因為啲衫洗完後機內殘留咗唔少水垢、衣物纖維、毛髮等，好容易滋生細菌同霉菌，令洗衣槽發臭，洗完啲衫褲都會沾有微生物。
老友教路，家巿面有唔少洗衣機清潔劑。購買嗰陣要小心睇標籤，選啱自己部機型號嘅清潔劑，好似有啲適用歐洲機、日本機，或者不銹鋼及膠製內槽嘅洗衣機。有個別清潔劑標明不適用於前置式、上置滾桶式同兩槽式洗衣機。
清洗後要過一次水
用嗰陣仲要睇清說明書，留意清潔劑浸泡時間，有啲可以浸泡少於3小時，有啲要浸10個鐘。如果浸過龍會損壞機件，「標籤唔清唔楚嘅清潔劑就唔好買嘞。」
老友仲話，部份清洗劑具有漂白作用，如果用清潔劑洗機後，過水唔夠徹底，殘餘嘅清潔劑會令衣物甩色，所以用清潔劑洗機後，要以一般洗衣模式清洗最少一次。
電郵：mailto:[email protected]