龔如心千億遺產爭奪案曲折離奇，高潮迭起，早幾個月風水師陳振聰玩神秘吸引傳媒追訪，唔現真身反而獨領風騷；近日輪到龔家出招，龔仁心頻頻曝光高調反擊。正當爭產案兩大男主角傾力演出，噚日忽然多咗個男配角，加添一點詼諧感覺。
鳳凰衛視出錯相
做茄喱啡的不是別人，正是「白花油王子」顏福偉。八方噚日睇鳳凰衛視訪問龔仁心節目，主持人一邊聽佢高談闊論，畫面不斷展示小甜甜照片，當講到陳振聰時，畫面竟然出現咗一幅顏福偉登台嘅靚仔相，電視台仲將福仔同小甜甜照片拼埋一齊。八方相信係有人認錯人，擺咗個大烏龍。
小甜甜生前感情生活被人公開，可能都非佢所願，仲要無端端同福仔扯上關係，今次真係失禮死人。
其實福仔同陳振聰人有相似，早喺陳振聰初次曝光時已引起諸事者議論紛紛，有人更指兩人樣貌好似倒模咁，似到十足十。福仔亦曾表示，如果有人開拍關於小甜甜電影、電視，佢唔介意粉墨登場飾演風水師。