一度鬧得沸騰嘅「郭家大事」似乎已經平息，大K郭炳湘近月好低調甚少露面，佢位正印李天穎Wendy噚日以生命熱線主席身份出席記者會。之前有傳大K被綁架後性情大變要睇醫生，八方以為Wendy會分享吓與家人同度逆境心得，但佢似乎心情麻麻，冇上台發言，亦唔接受訪問，儀式後同其他嘉賓大合照就鬆人。
四叔大仔、以珍惜生命協會始創人身份現身嘅李家傑就open啲。佢話幾年前曾經有位由細玩到大嘅同性朋友，經常一哭二鬧三上吊，狼來了得太多次，朋友都不以為意，點知呢位朋友最後真係割脈服藥雙料自殺，李家傑話因此唔開心咗一段日子，好在佢信佛，識得放低先開心番。