賓架P向來敬重老教授L，久唔久就請教授L出城，到占美廚房一聚。呢日左丁山剛好冇約人，正在諗緊叫信差買飯盒之際，猶豫不決，食鏞記叉雞飯吖，翠華魚蛋粉吖，還是羅富記魚丸粥呢？諗諗吓，賓架P位靚女秘書打電話嚟：「P先生話如果有空，請你到占美廚房與教授L一齊吃午飯。」當然一口應承啦，上一次與賓架P夾份約教授L，安排咗成兩個月，呢次撞到咁啱，仲唔急急講OK咩。
教授L駕到，先叫一杯dryMartini，左丁山醒起占士邦嘅標準對白，問教授：「究竟占士邦次次講stir與shake，有何分別？」教授話：「此乃小說家之言，作出嚟嘅，根本無甚分別！」教授識得享受生活，退休後仍然居於屯門青山，搭巴士到中環，畢竟係遠少少，故此甚少出城，既然來到占美，點番一客德國豬手，佢話係呢度嘅豬手先至整得好食，別處豬手總係差少少。占美嘅豬手確係遠近馳名，但係份量超大，三位女士共食都未必食得晒，左丁山上次吃了，飽足一日，有啲怕怕咯。
賓架P與左丁山同是教授L後輩，與佢吃飯，當然係只識請教，不識忽悠。教授話：「忽悠係乜嘢詞語？」唉，啱啱學識嘅咋，《大公報》喺四月一日報導中國駐英大使傅瑩女士對記者講：「說中國經濟實力強大，只是忽悠」（大意如此）。為咗要明白「忽悠」呢兩個字，左丁山上網二十幾分鐘，找到好多解釋。此「忽悠」係北方土話，由遼寧演員趙本山宣揚開去，意思指胡說、吹牛、吹水、鼓動、游說、亂點一通、靠滾等等多層意思，作動詞及名詞用。
教授L嘅中文、英文都好過我哋幾倍，絕對有資格喝住我哋：「不要忽悠我！」例如講起張愛玲小說，我哋就冇法子在佢面前忽悠啦。教授說張愛玲最好嘅小說係在三十歲以前寫嘅，二十零歲就寫得出《金鎖記》咁驚心動魄故事，已證明佢係一位寫作天才，別人可能一生一世都寫唔出。至於《小團圓》咯喎，教授話目前討論已進入「八卦」範圍，與文學扯不上關係咯。