曾爆出「奸商論」、「減薪一半論」，被人恥笑係「臭口局長」嘅商務及經濟發展局局長劉吳惠蘭，噚日再喺電台發表偉論。局長指香港創意產業有發展優勢，至於優勢何在？點解一般人好似唔覺得有優勢呢？局長答案好有創意，「點解社會同一般人都察覺唔到？因為其實創意產業本身就係咁。」
局長又話，創意要靠動腦筋，而唔少有創意嘅人，都鍾意匿埋自己搞作，所以一般人留意唔到。講完一輪，都講唔出香港優勢喺邊度。
後來主持人同佢東拉西扯，講到生仔，劉吳惠蘭呼籲大家生多啲，支持煲呔「生三個」嘅人口政策，主持人反問佢有冇興趣再添丁，只有一個仔嘅劉吳惠蘭有啲尷尬咁講，「我已經過咗一個適合年齡。」