小弟早前曾對畢傑、牽牛埋怨，本報甚少名家捧意甲場，可能因為咁，兩個老友最近早飛或本欄都貼多咗意甲，多人踩場至夠熱鬧，正！作為「主人家」我今次都推介兩個意甲波膽，但最冷算係吼葡超拿華主場贏費利拿3:2，博40倍回報。
逆市中，如果我係為扒冷而扒冷，毫無理據亂貼，一早收大信封。拿華近排聯賽戰績差，擺明因為對手包括賓菲加、波圖同埋布拉加等前列球隊，班波實力唔係咁差，特別留意佢哋平均每場主場接近入兩球，單係個馬連奴就腳風好順。費利拿近8場作客輸7場，照計難踢，但近年同拿華火併永冇話冇波入。兩軍年初喺葡盃合演一場費利拿贏5:3嘅激戰，今次唔望咁誇張，3:2就夠，補埋客軍領先但被反勝。
AC贏3:1啱數
講番老本意甲波，我喺意甲過關輕輕帶過場AC米蘭對萊切，因為博「讓球主客和」信心唔算太夠，但波膽就值一試。睇好3:1，係恩沙基、柏圖狀態唔差，加埋卡卡復出，要入3球唔難；不過，總覺得迪達回晒塘，唔能夠同艾比亞迪相比，由佢把關AC好可能都失波，贏3:1就啱數。
阿特蘭大主場對費倫天拿，喺意甲過關我已經貼咗和波，波膽首選2:2，博阿特蘭大上場開完後再翻冧，而喺度再推介「主/和」，因為費倫從來都有尾運。文：藍鑽石