的士佬嗌生意難做，已經唔係今時今日嘅事，我哋呢班唔做八折嘅夜更司機，更係兜到腳軟都唔見有客截車啦。短加長減有無幫助？長途車可以同八折黨一拼，但短途客少番好多，拉上補下其實又係差唔多。有晚同老黃打完牌，喺灣仔搭紅Van返屋企，上咗車先發覺加咗價，去筲箕灣由7雞加到8雞。唉，周末嘛，佢哋例牌「添啲」，紅Van收費無王管，過年、聖誕老奉加四成以上，試過有晚中秋節同阿鳳入石澳BBQ，凌晨三點走人時，見到架出柴灣嘅紅Van，居然索價廿雞！肉痛咪唔好上囉，後面仲有大大條人龍，根本唔休做，難怪紅Van牌費逆市仍飆上五百萬，的士只係死守三百零萬嘅關口。好彩嗰晚我有揸車，否則咁樣俾人㩒住搶，條氣一定谷到上心口。
文：黃師傅