解決完堂妹的問題，6歲表弟看來也很惆悵。「好煩呀，暑假我想去少林學功夫，但媽咪話只可以去北京學國語或澳洲學英文……」「煩？表姐我當年，淨係可揀喺港島定九龍上暑期英文班咋。」以前做小朋友，終極夢想是去日本迪士尼睇米奇老鼠，今天貓狗豬猴排山倒海。日本火車站長，有貓有狗，期望冧死小朋友；但我好驚囉，架火車呢，可否搵番人類嚟揸？
鳴謝：IwateGalaxyRailway.,Ltd.、日本國家旅遊局（JNTO）
下一站天后
姓名：小玉（Tama）
地頭：日本和歌山電鐵貴志川線
年齡：10歲
品種：招財feel的三色貓
記：「小玉，你家紅到氣勢一時無兩。可以跟讀者講講你的成名路嗎？」
玉：「喵！好多嘢係整定嘅。記得07年前我仲係隻無知青春小貓，喺車站旁邊小賣部打躉，一日瞓到黑。後來貴志川線因財困想執笠，班街坊就搵我做貓站長，招呼等車時發呆的客人，點知乘客話我kawaii，講吓講吓，傳到大阪東京，雜誌嚟搵我同model影fashion相，又有新聞採訪，人氣暴升，令車站起死回生。07年1月5日我正式做站長，去年4月又多咗個站長室，同兩位副手拍住上，咁就入咗行。」
記：「聽聞賺好多喎！」
玉：「關西大學幫我計過，07至08年為貴志站賺了11億日圓，之後拍咗兩本寫真，又出漫畫書、文具精品、DVD等，同大堆fans手作禮物都未埋數，不過我唔會答你實數，稅局追呀！喵！」
記：「咁不如講吓你呢年嘅工作大計。」
玉：「梗係宣傳貴志川車站同草莓農莊啦，我哋貴志川線有草莓號、小玉號同兒童號三款特別電車，3月我架專屬電車小玉號開通啦；除此，仲會影多啲特輯呀、寫真集咁啦。我哋另外有架畫滿草莓嘅草莓列車，畀情侶黐住一對對咁上，4月尾前都還是草莓季，嚟摘多兩粒喎。」
記：「你生活有咁大轉變，有冇怨言呢？」
玉：「講真，我家日瞓16個鐘，星期日奉旨休息，星期六人多的話都休息。到閒日得閒又瞓醒覺，主人小山小姐先會抱我出舖頭玩。以前我冇站長室，我會喺小食部打躉，家就會喺自己房，但就成日俾人睇住瞓覺。我最唔鍾意啲職員成日借意抱我，攬到我鬼咁實，夏天好熱㗎！」
記：「今日兒童節，你有咩同廣大的香港細路講呢？」
玉：「咁就梗係嚟搭我哋架兒童號電車啦！紅卜卜又靚，裏面有晒BB床仔、玩具展覽、木馬仔同成排扭蛋，可以扭限量玩具㖭，喵！」
貴志川車站
交通：由JR大阪站到和歌山站（乘紀州路快速線約個半小時，車費約$120），換九號線貴志川線（全日票約$55），TAMA電車、兒童電車及草莓電車輪番出發，約半小時一班，半小時到達。
網址： http://www.wakayama-dentetsu.co.jp
我不是跟尾狗
姓名：栗子（Maron）
地頭：日本IGR岩手銀河鐵道奧中山高原車站
年齡：8歲
品種：約瑟爹利
汪汪汪，小玉，你out啦，出年我實搶你個最受歡迎站長位！
Sorry，等我介紹自己先，我叫栗子，今年8歲。我係咪跟人貓尾？啋！雖然我係遲佢少少出道，但我同隻懶小玉唔係同一level！我成熟穩重，唔係淨係識擺甫士同人影合照，我仲識送客接客，行咇巡站，好專業㗎，你去網站睇吓我條movie啦，就知我工作認真。
話你知，以前呢個東北小小山中車站，一日得400人次使用，冇乜遊客，舊年6月我做名譽站長後，家每逢假日都會人頭湧湧，北至北海道南至沖繩，都有人專誠嚟捧我場，玩足幾粒鐘先肯走，威威！
阿小玉佢有貓列車咩？汪汪，唓，佢好彩啫，我最近夠出寫真集咯，汪汪汪汪……
栗子專屬網址： http://maron.moura.jp/
IGR岩手銀河鐵道網址： http://www.igr.jp/
馬騮孖住傳菜
姓名：阿福與阿谷
地頭：日本宇都宮Kayabukiya
年齡：4歲&12歲
阿福：「我哋唔似人哋淨係識行行企企同擺甫士。」阿谷：「我哋兩個真係有事做㗎。」阿福：「會遞毛巾，點菜。」阿谷：「同埋傳菜。」阿福：「老闆話我哋好用過……」阿谷：「啲人類夥計。」阿福：「仲唔使出糧。」阿谷：「其實我哋一開始只係老闆嘅寵物……」阿福：「不過生得聰明，好快就學識晒老闆嘅手勢……」阿谷：「咪順便幫埋手囉。」阿福：「政府規定動物一日只可以開工兩個鐘……」阿谷：「所以老闆train定多幾隻輪更。」阿福：「有客到喎！」阿谷：「唔同你講住喇！」
Kayabukiya
地址：日本栃木縣宇都宮市御幸本町4688
電話：（81）28-6623751
