做咗六年天文台台長嘅林超英，後日開始退休前休假。睇咗35年天，台長睇人仲叻，噚日喺傳媒歡送會上話，用手巾仔嘅人特別長情，所以揀男、女朋友，最好揀個用手巾仔嘅，用平價貨更佳，「用紙巾嘅話，用完就丟，冇長久。」
現代人越來越遲婚，台長噚日向單身記者催婚，原因係可以有啖好食，皆因台長夫人係廚藝高手，噚日親自炮製燒羊髀同芒果菠蘿批，人人食到唔停得口。
嫌身家多得滯
林超英任內不時俾人鬧掛錯風球，佢承認家做台長，唔會只睇科學數據，「純理性咁做，會犯好大錯誤！」又話市民鬧佢，係愛之深，所以責之切啫。總結台長生涯，佢以三句話講晒，「以科學為基礎，以服務為目的，以人民生命為第一考慮。」
佢將三句話印在紀念扇上，送畀新台長及同事做紀念品。退休後佢會遊山玩水睇雀，兼到學校同社團演講，但一定唔會下海，佢笑言覺得身家多得滯，「會諗點樣散咗去。」政府未宣佈新台長人選，暫時由助理台長李本瀅署任。