這是一個阿媽賣湯圓撐起一頭家的故事。
七十年代，寡母婆「糖水婆」靠搓湯圓賣糖水，在土瓜灣落山道由車仔檔做到入舖，「萬利」之名無人不識，還養大三個寶貝女。九十年代，女兒都成材，還以為可以安枕無憂，糖水檔光榮結業後舉家移民到美國，從此印印腳。好景不常，03年孻女阿Win一家經濟出現問題，而且欠下一身債，於是全家回流，阿媽乘機出山「重操故業」，於佐敦開設「湯丸皇」，將畢生「武功」傳授給女兒。阿Win由搓麻雀變搓湯圓，一年做足366日，為的同樣都是女兒，所以話，真係唔好睇小阿媽的力量。
記者：吳允冲
攝影：陳盛臣
馳名麻蓉湯圓$17/碗，生湯圓$30/打
湯圓配方由阿Win的祖母一代傳一代，東莞式餡料都是芝麻、花生加砂糖，不同的是以前大粒又厚皮，現在變得皮薄餡靚，難怪日銷二千粒。
搓麻雀變搓湯圓
糖水婆梁太在土瓜灣落山道開檔，日頭賣生果夜晚賣糖水，日日做足十八個鐘，一做便是30多年。供大女二女到澳洲讀書，惟獨孻女阿Win令她最不放心，「個女細個好貪玩，我就佢幫我包湯圓，一毫子包一粒，佢一日都可以賺到幾百蚊，轉頭就拎去買名牌，不過都好過學壞。」萬利生意好，枱凳擺到出街外，引來食環署掃場，「阿sir叫我唔好做去拎綜援，我駁番佢話，如果我拎綜援，你咪無人拉？到時你都要拎綜援啦！」成日畀人拉，賺埋都唔夠賠，98年梁太把心一橫將萬利結業，全家人移民美國。03年又因孻女一家經濟出現問題而回流，「返到香港，街坊都話食唔到我糖水婆煮嘅糖水好唔慣，我又心郁郁想再開檔。」奈何老人家已經六十多歲，於是找來孻女阿Win幫手，「佢游手好閒無嘢做，淨係去搓麻雀，個人好頹廢，嗰時啲人好興點死點死，我驚佢自殺，就拉埋佢嚟幫我。」
未放過一日假
從此，最愛賭錢，從不操勞的阿Win跟阿媽學煲糖水、包湯圓，「開舖頭九個月，我從來無踏出過舖頭一步，晏晝十二點開門，一路做到凌晨四點，朝早八點返屋企冲個凉，十點又死返嚟煲糖水。」可惜舖頭開業時是九月，攝氏30幾度何來有人食湯圓，蝕足兩個月，晚晚將大煲大煲糖水倒掉，幸好冬天後客人變多，土瓜灣的舊街坊都來幫襯，才轉虧為盈。開業五年來，阿Win大大聲說：「從來未放過一日假，就算新年舖頭休息三日，我年廿七都返嚟炒芝麻、磨芝麻，做到年初一先有得返屋企！」
呢個女人好貪錢㗎
上年年尾，阿Win的工作癮又發作，拿起抹布抹牆，就這樣導致了網球手，醫生要她休息三個月，她暈一暈：「成間舖啲湯圓都係我一個人搓，點停？醫生話我唔休息，就算拎50萬都醫唔好我！」她一路講，客人又不斷入來，湯圓一盆一盆的補充。「交畀員工做？試過啦，啲客食得出㗎！同我投訴皮厚，到頭來都要我自己嚟。」才不過五分鐘，她又搓好一盆湯圓。「隻手五條筋都發脹！點算？我休息唔通成間舖頭閂門？大儍哥次次嚟都笑我唔休息，指着我話，『呢個女人好貪錢㗎！』，有乜辦法，97年以前闔埋眼都賺得多過家，家啲錢都係逐粒逐粒湯圓賺返嚟！」
阿Win金句：「如果一年有367日，多出嚟嗰日我都要做嘢！」
女皇之九比一湯圓：
用水磨糯米粉加水搓成粉糰，且要不斷搓，入口才會煙韌。最重要的麻蓉餡，芝麻要洗七、八次，之後以人手炒芝麻，以九份芝麻一份花生的比例，做出東莞口味的麻蓉湯圓，加入花生碎比只有芝麻的麻蓉更香更有口感，入口沙沙的，滲出花生香，甜度適中，只此一家，難怪稱王。湯丸皇的糖水都以明火煲成，口味少甜健康，充滿住家風味。
生磨香滑芝麻糊$16
自家生磨的芝麻糊，芝麻掛碗，兼有米香味，不是開粉的貨色能比。
少林寺十穀粥$16
大儍哥從少林寺老僧取來的配方，正氣又健康，據說還可抗癌。
溏心番薯糖水$15
由親戚種的本地番薯特別鬆化，只用番薯、薑、水煲成，沒有加糖。
薏米腐竹$13
選用遇水即溶的元朗腐竹，腐竹香化在舌頭上，味道極濃郁。
湯丸皇（27363692）
佐敦庇利金街45號地下