前天，7歲堂妹抱着Kitty扁嘴，樣子苦惱。「媽咪囉！我想去日本HelloKittyLand，但佢話去過3次，今年要去啲新地方！」「Kitty唔係淨係KittyLand先有，台灣都有Kitty民宿、Kitty酒店房，仲有Barbie房瞓呀，好靚㗎！」我的舉一反三將堂妹帶入另一個煩惱漩渦。「死啦，如果我住Barbie房，Kitty會唔會嬲㗎？」小朋友，你們真的知甚麼叫煩惱嗎？
記者：劉嘉蕙、陳慧敏
部份攝影：劉嘉蕙、陳慧敏、梁佩芬、馮冠芝
為Kitty反面
有些酒店設有Kitty主題房，但都只是換吓床單執吓裝修咁大把，對Kitty迷而言，怎夠過癮？最攞正牌大傾銷Kitty住宿的，還是台灣新竹這一間，由入口到出口，可Kitty的都Kitty了。但若真要住進去呢，還是有點難度，因為第一，全度假村得兩幢Kitty別墅，分粉紅的英式及青綠的法式，全幢一晚約$5,000，三房兩廳，預你幾個family來聚會，對台灣同胞而言可能唔錯，但係香港我邊度搵咁多人去住呢？就當兩個人租一幢別墅，咁大間屋真係有啲空虛㗎，幸好有Kitty陪食tea補數。
第二，美麗有罪。假如我三姊妹齊齊趁墟，面對一屋Kitty電話傢俬毛巾床單，很難沒有攞走一兩件作留念的慾望，咁你攞咗毛巾，我可以攞乜嘢嚟留念先？仲話臨走送一隻絨毛Kitty同旅行裝手信？點夠分呀？反面都似！
統一渡假村馬武督渡假會議中心
地址：台灣新竹縣關西鎮金山里4鄰34號
網址： http://www.uni-resort.com.tw/hellokitty.htm
房價：一座別墅約$4,600起（3房2廳）
歡樂醫院
想找HelloKitty陪瞓，去Kitty醫院。台灣彰化縣的皓生醫院，是全球唯一獲Sanrio授權的HelloKitty醫院：走進大門，會有30厘米高Kitty跟你打招呼；在醫院裏穿梭的，是身穿Kitty圍裙的護士姐姐；育嬰房裏，每個熟睡的小baby身上蓋的都是Kitty被被，讓醫院原本冷冰冰的空間，顯得溫暖可愛。
溫馨提示：
這裏是醫院不是景點，不可肆意白撞，除非你突然穿羊水、小朋友患感冒，不然不可在醫院裏影相觀光，騷擾病人。
皓生醫院
地址：台灣彰化縣員林鎮萬年路三段133號
網址： http://www.how-baby.com.tw/
LEGO仔搬行李
財雄勢大到起成間酒店的主題樂園不多，丹麥HotelLEGOLAND是少有非迪士尼系，又辦得有聲有色的一間。按邏輯，HotelLEGOLAND應該要很LEGO，如用LEGO搭張床或廁所，但這間酒店以舒服為重，除了用LEGO砌守門口的bellboy外，大部份客房還是採用穩陣傢俬。要是你想要好LEGO的畫面，可選海盜、武士或公主主題房，內有LEGO人仔模型，又或乾脆住KidsHouse，一大桶LEGO積木任玩。
HotelLEGOLAND
地址：Aastvej10,DK7190Billund,Denmark
網址： http://www.hotelLEGOland.dk
價錢：基本套票包LEGOLAND兩日通行票，雙人房一間，$2,974起。
細路作主
任你行程plan得再親子，揀酒店從來是大人玩意，有兒童房有Wii玩，只能當作是bonus。真正夠guts搵小朋友做主人的，睇怕只有去年開業的悠活兒童旅館。68間房，34個故事主題，想玩消防員定機械人？室友是熊貓還是甲蟲？都由小朋友去揀。附設多個遊戲室、圖書館、完備娛樂活動及水上設施，唔怕悶親小朋友。
旅館最感人之處，是它由父母心出發，幫父母照顧埋小朋友的安全。以浴室為例，旅館特地將浴缸造矮啲，方便大人幫小朋友冲凉，連馬桶都是小小的一個，fit晒屁股仔。大人嫌悶？做爸媽的想玩就去玩吧，皆因酒店有GPS，小朋友去到邊都有紀錄，想迷路都難！
悠活兒童旅館
地址：台灣屏東縣恆春鎮萬里路27-8號
網址： http://www.yohokidshotel.com.tw/
房價：「寶貝當家專案」：2日1夜$975起，送寶貝專屬禮包括兒童餐、童玩世界課程五折券及商品八折券等。
一泊三食玩火車
台東知本老爺大酒店繼去年推出粉紅到不得了的Barbie房後，今年終於照顧男子組，以Thomas火車為主題，一人一間冇呷醋。由check-in開始，只要登記Thomas火車房，上房前都可到一樓玩具展示廳熱個身。又因是溫泉酒店，所以有一泊三食方案，餐與餐之間，爸媽可去浸溫泉，小朋友則可參加酒店準備的康文活動，踩單車射箭等，非常周到。小朋友玩到攰返入房，兩秒就瞓着了。可愛Thomas，我們夢中見。
知本老爺大酒店
地址：台灣台東縣卑南鄉溫泉村龍泉路113巷23號
網址： http://www.hotel-royal-chihpen.com.tw
房價：「歡樂Thomas&夢幻Barbie」套餐，$1,820起，包主題房間、早晚餐、風呂、文康活動等。
