章小蕙可謂神奇，可以從欠債2億，到今日自言可以隨時籌集數以億計的資金去拍戲，她又千真萬確是導演奧利華史東新片中眾多監製之一，人到中年仍天不怕地不怕。雖然時值金融海嘯，但45歲的章小蕙一個翻身又可以從頭嚟過，在她所謂的鱷魚潭中打拼。 撰文：何永寧
章小蕙多年前到美國荷李活闖天下，回來劈頭第一句就要多謝香港傳媒，她自言能突圍而出，全憑當年在港不斷跟傳媒打拼，她笑說：「同你哋打交道真係要打醒十二分精神，講每一句說話都要好小心，久而久之訓練有素，所以去到荷李活呢個鱷魚潭都可以應付到，冇俾人食到。」
章小蕙憑三寸不爛之舌成就與名導演奧利華史東（OliverStone）合作，參與監製荷李活電影《W.殊不簡單》及參演一角，她形容這次是機緣加上運氣：「幾年前離開香港之後，喺美國修讀戲劇課程，其間咁啱有位電影製片想搵一個中國女演員，傾傾吓就講到奧利華史東想搵人投資佢部片，就透過我搵到楊生（楊受成），楊生一聽見係奧利華史東嘅戲，就一口答應。」
打靚佬湯主意
整件事前後只花了一個月時間商談及籌集資金，章小蕙形容自己像火箭一樣的效率，令外國人嘖嘖稱奇，更因此被他們稱為Wowgirl（神奇女孩之意），導演事後還追加一個角色讓她演出過過戲癮。
章小蕙表示能夠短時間爭取到資金在手，是她能極速進入這個「遊戲」的原因，她說：「嗰一刻佢哋直情當我係公主，畀我嘅體驗係天同地，做女演員嘅時候，係求人畀角色你演，家係你攞住錢去揀合作對象，感覺係高高在上。」她還表示透過多年在香港建立的人脈關係，目前經她籌集準備投資的資金數以億計，有機會合作的演員據章小蕙所言有羅素卻爾（RussellCrowe）、奇連伊士活（ClintEastwood）、湯告魯斯（TomCruise）等不能盡錄。
事業剛剛起步
章小蕙坦言往後會循幕後發展，在45歲之齡開始自己人生的事業，章小蕙認真的說：「畢業冇幾耐就結婚生仔，從來都冇自己嘅事業，廿幾歲時只係湊仔，家只係追番以前想試但冇試嘅嘢，雖然係遲咗起步，但都係一件好事，因為20歲嘅時候未必有呢種智慧，太單純，有機會都做唔到，去到荷李活咪盞俾人食埋骨都冇剩。」
攝影：陳俊強 場地提供：W酒店
一腳踏五船
章小蕙雖然專注事業發展，不過對於為人津津樂道的愛情生活仍不會放棄，她說：「愛情一定要有，有時工作太攰，約會可以令荷爾蒙提升，更有推動力。」與前銀行家男友的年半愛情已告一段落，但感情生活依然精采，章小蕙風騷地說：「手上有積蓄，都有一隻手（指五位）嘅追求者，用地區計，有L.A（洛杉磯）、米蘭、巴黎、東京同內地，內地嗰位好有潛質，亦有一位法拉利F1車手追我，都係拍住先，暫時唔會諗結婚。」追求者遍佈世界各地，玄妙處在於職業林林總總層出不窮。
經歷過婚姻失敗並沒有為神奇女俠留下半點陰影，章小蕙說：「呢方面（愛情）我個人好勇，不過就未遇到一個有內涵、令我神魂顛倒嘅男士，有先考慮再婚。」要成為章小蕙的對象，她表示是否有錢人家並不要緊，反而要有至少6呎高才是考慮之列。
