一向恨做媽咪的黎姿，為求有仔趁嫩生，今年初與52歲富商馬廷強結婚後，便積極展開造人大計，結果皇天不負有心人，37歲的黎姿據悉已懷孕兩個多月，預計今年11月迎接小生命來臨。大前晚，穿上鬆身衫的黎姿偕老公到中環拍拖睇戲，全程笑到四萬咁口，幸福滿瀉，一切盡在不言中。
黎姿為專心照顧07年車禍受傷的胞弟黎嬰，及打理胞弟的美容生意，去年毅然宣佈退出娛樂圈，而今年初，黎姿與拍拖6年的富商馬廷強在澳洲註冊結婚，2月在香港半島酒店補擺喜酒，正式過其少奶奶生活。
由於黎姿與馬廷強均十分喜歡小朋友，加上二人有感年紀不輕，所以婚後夫婦一條心努力造人，希望趁早生夠3個，與黎姿私交甚篤的無綫高層樂易玲，也曾表示黎姿「一定會生」和「好快生」。
待胎兒穩定即報喜
連月來，有關黎姿懷孕消息一直傳個沒完沒了，但據悉黎姿目前原來只是懷有兩個多月身孕，由於怕BB小器，所以黎姿才一直不敢向外承認，打算待胎兒穩定後才公佈喜訊。雖然黎姿要專心在家安胎，但她仍不忘與老公馬廷強拍拖溫馨，如大前晚，黎姿便與老公到中環國金商場的戲院睇戲，同行還有陳霽平及陳沛嘉經理人ToyiAu。
剪短頭髮襯鬆身衫
大前晚，黎姿與馬廷強及女性友人Toyi到IFC戲院欣賞今屆奧斯卡最佳外語片、影帝本木雅弘主演的日本電影《禮儀師之奏鳴曲》，而今次也是黎姿婚後首度與老公現身公眾場合。一行三人於凌晨12時許散場離開後，馬廷強一馬當先乘扶手電梯往停車場方向，黎姿及友人則緊隨其後。穿上鬆身上衣襯牛仔褲、手挽Hermès靚袋的黎姿，把秀髮剪短。
當黎姿見到記者拍照時即閃身迴避，同行友人着記者不要拍照，但一向低調的馬廷強卻態度友善地笑說：「由得佢哋啦。」然後企定定任影唔嬲，表現落落大方。
記者問黎姿是否有身孕時，黎姿雖然頭耷耷未有回答，但全程笑到四萬咁口，一副幸福少奶奶模樣。黎姿胞弟黎嬰07年遇上嚴重車禍受傷，日前其母親陳婉代兒入稟高等法院向肇事的士司機及車主索償，記者向黎姿追問胞弟索償一事，以及她對事件的睇法，但黎姿依然封口不肯多講半句。
乘40萬房車離開
有見老婆大人不欲接受訪問，馬廷強即為太太解圍說：「我哋唔會接受訪問。」之後黎姿與夫婿等搭往停車場後，由馬廷強駕駛其40多萬元黑色Audi房車接載離開。
採訪、攝影：娛樂突發組
體貼入微：日日食燕窩超大莊園待產
37歲的黎姿屬高齡產婦，加上是第一胎，所以老公馬廷強十分緊張，要傭人日日燉燕窩給老婆補身，每月陪她看醫生；知道太太心繫胞弟黎嬰的皮膚中心，故派女助手到公司坐鎮，免黎姿每日操勞。
雖然懷孕才兩個月，馬廷強已做足準備工夫，包括翻新半山蘭心閣愛巢及裝修BB房，還安排黎姿到其位於悉尼一個10萬呎莊園度假兼待產，並選擇鄰近的皇家阿弗雷德王子醫院（RoyalPrinceAlfredHospital）生產。該院頂級生仔套餐收費不菲，順產費用約港幣16萬，開刀則約港幣20萬左右。據知黎姿計劃順產、令身體快些復元再追第二個，但馬廷強為黎姿安全計，主張開刀，愛護之情溢於言表。
守口如瓶：未足三個月不敢報喜
黎姿懷孕兩個月誠然是美事，但據中國傳統，孕婦懷孕三個月後才能公佈喜訊，以免BB小器，難怪黎姿與其他準媽媽一樣，沒有承認喜訊。
徐子淇
06年與恒基二少李家誠結婚後，頻傳喜訊，但她一概否認，至翌年2月身形暴脹的她才親口證實懷孕三個月。去年11月，徐子淇再度造人成功，承認懷孕三個月。
吳君如
06年懷有第一胎時，即使肚大如籮仍堅稱只是發胖：「我個人好鍾意出風頭，但唔使擺喺生仔度。」月前傳她再度有喜，君如照舊否認：「總之呢一刻係冇啦。」
袁詠儀（圖）
05年底證實懷孕，為免BB小器一直封口，就連老公張智霖向外暗示將為人父，袁詠儀也否認：「我都唔知自己懷孕，可能佢嘅國語講得唔好令人誤會。」
甘比
劉鑾雄愛將甘比（陳凱韻）08年1月證實懷孕，但一直秘而不宣，至懷孕四個月，因身形明顯發胖才露端倪。去年10月誕下一女。
歐倩怡
與郭晉安結婚後一直努力造人，至07年中終於一擊即中，至懷孕3個月，歐倩怡開始「見肚」，郭晉安即解釋謂太太只是「日久失修」而已。
資料來源：《蘋果》資料室
喜事齊來：眾女星生B冲喜
經濟低迷，最好生仔，一則冲喜，二則刺激消費。一眾娛圈準媽媽也秘密練兵乖乖安胎，準備生番個靚B，大家開心。
準媽媽：姚嘉妮 年齡：31歲
預產期：本月 胎兒性別：未知
準媽媽：徐子淇（左圖） 年齡：26歲
預產期：夏天 胎兒性別：女
準媽媽：陳慧琳 年齡：36歲
預產期：8月 胎兒性別：男
準媽媽：LeahDizon（日本）（右圖） 年齡：23歲
預產期：本月 胎兒性別：女
準媽媽：宮澤里惠（日本） 年齡：35歲
預產期：6月 胎兒性別：未知
資料來源：《蘋果》資料室
