18歲的賭王三房索女兒何超蓮，前晚穿上低胸露背裙出席慈善Ball，令人眼前一亮。但超蓮的性感打扮招來阿媽陳婉珍不滿說：「我梗唔OK！」，除即場訓話女兒，更踢爆她蠱惑招博着性感衫。
今年18歲的賭王三房索女何超蓮，復活節回港風頭大盛，她前晚陪父親何鴻燊和母親陳婉珍在灣仔君悅出席東華Ball，超蓮穿上一件D&G白底繩結印花裙，性感低胸露背，早前餅女楊愛瑾（Miki）都曾穿過同款裙出席活動。
「淨係畀相阿爸睇」
超蓮被記者包圍影相，她即時按着心口尖叫，不斷面紅儍笑，後來更向朋友借來披肩遮胸，問她為何不打底？她說：「冇得打底，貼晒膠紙喇，你哋唔好追住我。」超蓮上圍豐滿，她搖搖頭表示無戴nudebra，她害羞地說：「媽咪遺傳得好囉，我平時都有跑步做運動。」問她可有狂蜂浪蝶追求？她說：「唔會，我會減少性感喇。」
每次出街，超蓮都會試衫問准父母，她指賭王父親沒過問她的衣着，但禁止她穿有粗口字句的衫，更嚴禁講粗口。提到她比同場的家姐超雲更靚女，超蓮即時耍手擰頭說：「唔好咁樣比較，佢有第二啲靚，佢靚啲，唔好咁講，佢會唔開心。」
賭王對女兒性感現身毫無所謂，但家教甚嚴的三姨太陳婉珍則頗有微言說：「我梗唔OK啦，佢好鬼馬，淨係畀張相阿爸睇，阿爸就話着得，冇畀我睇過，我唔知佢着成咁。」問三姨太能否接受囡囡更性感的打扮？她笑笑口但面有慍色說：「再性感不如唔好着啦！」
超瓊：為安全着想
另外，何超瓊收到恐嚇信報案後如常外出，她說：「唔需要繼續講，已經處理咗，我擔心自己啲生意多啲。」記者指她膽生毛，她說：「任何人都為自己嘅安全着想，我問心冇做過啲嘢危害其他人，唔會有嚴重問題。」
採訪：梁錦雯
攝影：林德雄