香港出生率回升，童裝市場有一定發展潛力。但提到童裝品牌，大部份只諗到雞仔、河馬等標記。觀乎香港本土童裝設計，嗯，真係要諗諗……其實本港亦有童裝設計師默默耕耘，因一場海嘯，有人辭官也有人趕科場，但同樣夢想擁有自己的童裝王國。
記者：林佩婷
攝影：陳盛臣
囡囡令設計更完美
童裝設計師Maggie，本來對安全標準又或使用物料已有充份認識，直到懷了囡囡Cassidy後，發覺更加了解童裝設計。「以前雖然知道邊啲物料安全，但唔了解小朋友成長階段，好似以為130碼可以着到10歲，原來5歲可能已經未必啱着。到我有咗個女，先知原來BB大腿、PatPat會大啲，對尺寸有更切身嘅標準。而且小朋友大得快，有扣鈕或橡筋調校大細，就會着得舒服啲同無咁浪費。」
化危為機 大熱揹帶
07年Maggie開始網上兒童服裝買賣，生意尚算不俗，更儲到一班熟客。本來穩穩陣陣，但她選擇於金融海嘯創業開門市，原因是她看好發展前景。「做網上店，始終有客想摸吓件貨先交收，我就缺乏咗一個集中佢哋嘅地方。而且開店可測試吓自己品牌實力，點知開咗約4個月就已經有錢賺，令我信心更大。」
除鞋跟襪仔，成間店的貨品都出自Maggie設計，包括初生至10歲男女童裝、親子裝、嬰兒用品、連大熱的揹帶都有，每星期最少設計12款，每個月生產萬五件衫，依然供不應求。「我好鍾意睇日本時裝雜誌，睇得多自然靈感都多，好似家興Legging，我就特別設計咗啲超貼身同高腰嘅豬腸腳Legging畀小朋友，唔夠幾個月賣超過2,000條。雖然我老公間廠幫我生產，但資金成本流動問題，我哋每款衫最多按6個碼做150件，以求快清貨。」
CottonCandyKids（29410250）
打造MiniJohanna
何志恩（Johanna）本身為時裝設計師，同樣因為囡囡Natasha的出世而開始設計童裝。「嗰陣囡囡大約1歲，冬天同佢着衫時覺得啲手袖、褲腳太細好難着，於是靈機一動，不如自己幫佢設計過啲易着嘅衫。好似袖要闊、型得嚟又要方便，我覺得針織可以玩嘅元素多啲，又有彈性，咩碼都得，用嚟做Top仔、裙仔最好睇。我本身鍾意舒服得嚟又型嘅設計，最緊要襯番自己，設計童裝都一樣，我設計畀囡囡嘅衫都係剛中帶柔，感覺就似MiniJohanna。」
最想設計哺乳衫
除童裝外，Johanna最想設計餵哺母乳的衣服。「做咗媽咪後，先發覺原來市場好缺乏方便媽咪餵母乳嘅衫。試過喺飛機見到人就咁打開心口餵奶，又或求其搵塊布包住就算，所以我就想設計啲方便媽咪嘅衫。」
只是，之前Johanna雖曾將童裝演變成一盤生意，但現已暫停！「出咗一季後遇到金融風暴，我又咁啱大肚，加上出童裝限制都幾大，所以暫時停咗。」
MiDes首間童裝專門店
除有本地童裝設計師崛起外，香港本地童裝品牌MiDes專售初生至3歲的嬰兒服飾及用品。以往只於永安、吉之島等設有銷售專櫃，3日前在黃埔花園開設了首間童裝專門店，土炮童裝勢將越來越受重視。
地點：紅磡黃埔花園十一期聚寶坊地庫一層B38號舖
查詢：22661000
