一對港漫拍檔，兩位《街頭霸王》漫畫的靈魂，你說他們鹹魚翻生，還是鯉魚翻身都絕不介懷，事實因《StreetFighterⅣ》遊戲大賣，才承勢再出書；兩位係咪打住機度橋？錯晒！而且答你︰「兩個都掛住打，唔使出書喇！」
記者︰陸俊雄
攝影︰譚盈傑
你睇攻略我睇YouTube
《街頭霸王》第一輯漫畫是在91年推出，那時我是小學生，係隔籬位同學上堂偷偷從書包拎出來介紹畀我認識，我當然二話不說，舉手供佢出來，等你咁得戚嗱！幾鍾意許景琛老套但中Point的一句集體回憶，因為係「港男」，唔多唔少過癮回憶都同《街霸》有關，諗起當年三大天王嗰套《超級學校霸王》已經想死。
度古仔的李中興仲話，佢哋嗰時已經同遊戲好同步：「由8人發展到12人，後來咩東方不敗版，全個畫面都係波，漫畫跟住照畫。」到今日佢會喪睇Game書攻略，漫畫亦要跟住角色格食格，要俾讀者知佢係識打同有研究；許景琛則上網睇人哋對打片段居多，笑言自己年紀大少打機了。阿興明顯仲會落場嗰種：「我夠知高手輕拳都屈得死人，但漫畫唔通又話一個輕拳KO人咩？讀者仲唔搣爛你本書？」雖然咁多年來，二人都未坐低嚟番場，但各有各搵靈感方法，依然與時並進，仲好識時務。
以為無得再出
「出完《街霸Ⅲ》漫畫後，我以為已經玩完！」就算阿興搵過幾次許景琛想添食，畫多幾本《街霸Ⅲ咩咩篇》，都一口拒絕，事關覺得未有衝擊亦未係時候，同時又唔知點去延續落去。直到舊年許景琛在網上見到《StreetFighter4》條GameTrailer，大玩潑墨效果，覺得唔畫唔得，先促成到新書出街。
許景琛都唔太執着人哋話佢食住條水，始終《街霸》創過125期的佳績，令佢人生上過高峯。阿興則覺得，聽到有人仲會叫RYU做赤龍，已經心足。因為遊戲始終是遊戲，無生命，某程度上今日港男對RYU和KEN等的性格認知，係藉着呢兩位作者所賦予的。
讀者要穩陣
二人筆下，春麗差啲俾印度佬強姦，KEN更係俾豪鬼雞姦，呢種港漫風味新書入面唔可能再出現，因為以前無理版權問題，但今日係正式向日本簽約，內容上好多限制，亦講好出15期有頭有尾。許景琛話︰「好似Game入面RYU無着鞋，今次就要跟足赤龍無鞋着。你所提及嘅爆炸性內容，更加唔可能。」之後仲補充話，唔少讀者同佢哋講今次穩穩陣陣已經夠，其實毋須太煽情。以香港人咁愛話題性的心態，係真唔係我唔敢講，不過睇見跟足遊戲的靚靚潑墨畫風，就睇足你15期都覺得值，Fans買個大掣打機都近千啦！
同場加映
PS3街霸Ⅳ活動一連串
《潮玩四代PlayStationStreetFighter》
及《街頭霸王4》原畫展
日期︰4月4日至5日；4月10日至13日
地點︰屯門時代廣場
《PS3StreetFighterⅣ機王終極爭霸戰》
日期︰4月12日（香港區）
地點︰沙田中心
日期︰4月13日（亞洲區︰挑戰韓國及台灣霸主）
地點︰屯門時代廣場