家唔少人都買咗FullHD全高清薄屏電視機，啲size普遍成40吋，屏幕像素達1920×1080，用嚟睇數碼高清廣播節目或blu-ray藍光影碟，啲畫質當然靚到飛起，但一轉台睇有線電視節目、DVD影碟，或者打Wii，因為輸出嘅像素唔夠，畫面起格同矇查查，落差真係好大。如果屋企有舊式VHS錄影機，播番啲帶畫質更加慘不忍睹。
咁屋企收埋啲DVD、VHS帶點算？想提升畫質，都唔係冇辦法嘅。AVConsultant影音顧問瑩瑩話，最近引入咗美國品牌增線器DVDOEDGE，可以將二十幾種唔同解像度嘅訊源，提升至1080全高清嘅格式，如DVD影碟嘅480，可轉換到最高嘅1080，由隔行掃描，增至逐行掃描，咁啲畫面就靚好多。
有各種輸入端子
瑩瑩又話，部機有齊唔同嘅輸入端子，包括RCA、S-Video、色差、同軸、光纖，同埋六組嘅HDMI，足夠用家接駁唔同嘅影音產品，其中前版面一組隱藏式HDMI輸入端子，方便用家連接PS3、DV攝影機、NotebookPC等隨身配備。
至於輸出端子有兩組HDMI，一組HDMI用嚟傳送影像訊號到電視機，另一組可以將聲音訊號輸送到擴音機。
如果擴音機未備HDMI端子，可經光纖線輸送聲音，「部機除咗可以提升畫質之外，仲可做埋中央處理系統，管理唔同影音產品，駁晒線之後，連家庭主婦都識用。」想靚聲靚畫，機價賣7,680元。