蘇施黃幫無綫包拍煮食節目《蘇Good》反應唔錯，連帶做代言人同廣告都拍到唔停手，有傳佢賺咗1,500萬，真係豬籠入水發過豬頭。噚日阿蘇喺銅鑼灣幫一個法國高級廚具Cristel做代言人，即場教整薑汁撞奶。
俗語話財多身子弱，阿蘇兩個月前去做身體檢查，驗出血糖過高，因由係食得飯多，所以佢由每餐食兩至三碗飯，縮到一個禮拜至有幾粒米落肚，唔怪得瘦咗啲。阿蘇笑笑口咁話：「我想同大家見多幾年，想活多50年，家見到飯又肉痛又流口水。身體除咗血糖高之外，託賴都健康，多謝關心。」
「都唔夠東涌買樓」
馮仁昭仲想八吓阿蘇係咪賺咗1,500萬，點知佢猛呻窮話：「係就好囉，月底開始拍新一輯《蘇Good》，暑期推出，有60集，係有加人工，但都唔夠喺東涌買層300呎樓。」