國家機密曝光呀！職工盟立法會議員兼支聯會副主席李卓人係恐怖分子呀！一個自稱共青團員、操流利普通話嘅愛國憤青，噚日喺港大中山廣場洩露驚世機密，喺阿人面前當眾高呼：「共產黨認為你是恐怖分子！」
當李卓人係恐怖分子
港大社會科學學會噚日舉辦六四論壇，邀請李卓人、時事評論員劉銳紹（夫子）同學聯前代表陳清華出席。幾位嘉賓發言後，輪到台下觀眾講嘢，一個紅衣青年即刻搶咪，對於港人要求平反六四多年不果，呢位憤青似乎好不滿，提出「平反五部曲」，訓示各人，曉以大義。
「你會不會加入中國共產黨？我認為加入共產黨是改變中國的最好方法。」紅衣憤青質問夫子，夫子謙稱冇資格，又話當年方勵之曾建議佢入黨，點知方勵之1987年被逐出黨，夫子做唔成黨員，可惜。阿人問憤青是否中共黨員，佢否認，但表示所有大陸學生都係共青團成員。佢又對住阿人講：「想為中國貢獻，不應反對共產黨。」阿人話自己都想貢獻國家，但佢連返內地都唔得，點算？
憤青繼續嚴詞訓斥阿人，「你們不要只講中國落後的一面，你罵他們（中共），就不會跟你合作……人民可以罵（中共），你們是恐怖分子，不可以罵，共產黨認為你是恐怖分子。」八方相信阿人勢估唔到，舉住燭光要求平反六四，竟然會被打成恐怖分子；本來場面有些少火藥味，此語一出，全場圍觀嘅學生即刻爆笑，氣氛頓然和諧。
多去新加坡、睇毛語錄
唔知係咪被指恐怖分子太刺激，八方見阿人開始滴汗，睇真啲，原來落雨啫，有學生起哄搞gag，話有人激嬲個天，「嗱！講錯嘢嘞，落雨喇。」點知憤青繼續教精阿人同夫子，叫佢哋多去新加坡考察，可能想佢哋習慣吓當地一黨獨大專政氣氛；同時要多看《毛語錄》，自然就同中共有偈傾。八方想多聽憤青高見，但佢耍手擰頭不願多談，問勻在場港大社科生，冇人識佢，斷估佢係潛得好深嘅內地生。
mailto:[email protected]