香港高官以能夠做「紐倫港」自豪，其實單計人工，香港唔只拍得住先進國家，甚至超英趕美。英國國會議員早前加薪2.33%，年薪加到71.2萬港元，逆市加薪備受非議，首相白高敦見勢色唔對，宣佈內閣大臣今年凍薪，以示與民共度時艱。
僅次新加坡
英國輿論卻認為高官凍薪都唔夠，應該全體減薪，列出10個最高薪國家或地區領導人。結果顯示，全球最高薪領導人係新加坡李顯龍，年薪達247萬美元；香港特首煲呔，則位列次席，年薪有51.6萬美元，即係接近450萬元港紙。亞洲兩個奀豬地方，領導人薪酬竟然冠絕全球，難怪成為國際新聞。
排第三先輪到超級大國美國總統奧巴馬，年薪少煲呔一截，只得40萬美金，法國總統薩爾科齊年薪31.8萬美元，居第五位。香港前宗主國首相白高敦年薪大約只有煲呔一半，僅27.9萬美元，應該好羨慕煲呔份人工。
好近香港嘅日本，首相麻生太郎年薪24.3萬美元；至於偉大祖國領導人，年薪十大不入，賬面睇未夠班躋身大國。