內地新書《中國不高興》熱賣斷市，引起國際傳媒關注，認為係繼《中國可以說不》之後又一民族主義冲昏頭腦之作。呢本書香港都有得賣，八方唔清楚有幾多香港人認同書中觀點，卻知道繼中國不高興後，中國記者都好不高興。
長和系拒內地傳媒採訪
話說上星期長和系業績記者會，全球傳媒湧至，長和方面卻以場地空間不足為由，婉拒多家內地傳媒採訪，據講唔少內地記者好不滿，質疑長和「另眼相看」，頂住道氣。有人猜測可能係怕俾人問到內地爛尾樓問題尷尬，所以有此安排。
事隔一星期，事件仲有下文，《香港商報》論壇版噚日刊登兩篇署名文章，分別題為〈香港對內地傳媒公關亟待改善〉同〈從拒絕內地記者入場想起〉，兩篇文都不點名批評長和系歧視內地傳媒，狂鬧李超人漠視內地小股民利益，「內地客戶和投資者難道不需要通過內地媒體直接傳遞的一手資訊嗎？」
對於長和記者會只許香港同外國記者入內，文章作者認為擺明歧視，好似舊時上海租界嗰塊「華人與狗不得進去」招牌。兩篇文章上綱上線，燒埋香港政府嗰叠，話唔只上市大公司，其實特區政府亦排斥內地傳媒，香港高官「繼承港英殖民地時代視中國為外國的一貫做法」，「受殘留的舊體制、舊機制、舊觀念、舊傳統影響」，對內地傳媒、民眾仍然維持「那種高高在上的心態」。
新聞處只設海外關係組
鞭撻港英餘孽、舊電池之後，輪到政府新聞處受靶，文章指回歸十幾年，新聞處竟然不設專責部門同內地記者打交道，只得「海外關係組」招呼洋記者。文章作者指出，香港要北京放水打救，必須靠內地媒體助一臂之力，經濟復蘇才有保證；繼續自高自大、剛愎自用，拒絕、排斥、歧視內地媒體，肯定冇運行。
長實和黃同新聞處都否認歧視內地記者，長實指當日記者會有多家內地傳媒出席，新聞處稱對所有記者一視同仁，內地媒體來港採訪一定提供協助。如果上賓對待內地記者就可以振興經濟，繁榮安定，特區政府就唔使請咁多政治化妝師啦，憤青思維可能比較簡單，八方同香港人就冇咁天真嘞！
mailto:[email protected]