陳冠希嘅家姐陳見飛噚日同名模Rosemary一齊出席喺觀塘舉行嘅復活節活動，活動上陳見飛嘅男友Felix充當觀音兵，全程陪住女友工作，連訪問嗰陣都好似連體嬰咁形影不離，陳見飛亦大晒幸福咁話：「除非佢有嘢要做，如果唔係我哋差唔多去到邊都會一齊！」
保護老竇私隱
講到陳見飛爸爸陳澤民已經申請破產，而且仲有消息話佢搬咗去旺角度住，陳見飛就話：「我梗係唔會講佢住喺邊，相信我爹哋都想保持佢嘅私隱，我只可以話唔怕爹哋住唔慣，我哋成日都會見面，而且同家姐又會搵佢食lunch，佢係一個堅強嘅人，相信佢冇問題。」
除咗爹哋會聯絡之外，陳見飛話同細佬陳冠希都經常聯絡，不過，講到Edison喺呢個星期日會去新加坡做《神鎗手》嘅宣傳，本來諗住問佢有冇擔心細佬安全，點知陳見飛就話：「我唔知佢會去新加坡喎！不過就算佢喺香港嗰陣都唔知佢做啲咩啦，我哋平時好少講工作，不過我唔會擔心佢，呢啲嘢冇得怕，唔可以為避而改變生活。」