港人愛奶茶，朝早飲，下午茶又飲，OT飲特別醒神，加份鬆軟蛋治更是絕配。在佐敦享譽多年的澳洲牛奶公司終於遇上挑戰者，新開張的young版茶餐廳「北海道牧場」憑着以北海道3.6奶做的炒蛋及奶茶，瞬即成為今期人氣餐廳。《蘋果》讀者今個周六、日仲可以免費試飲奶茶！
記者：吳允冲
攝影：伍慶泉、王文忠、吳允冲
模特兒：ManYu@StageModels
通粉湯底都用3.6奶
北海道3.6奶因為乳脂含量高達3.6%，特別香滑，奶味濃厚，谷祖琳的「小甜谷」就以3.6奶做燉奶，賣個滿堂紅。新開張的北海道牧場餐廳都以3.6奶做賣點，餐牌上由炒蛋、奶茶、咖啡都有混入3.6奶，甚至通粉的湯底，都用雞湯加3.6奶煮成，完全沒有味精。難怪甫開張，已引來銅鑼灣一眾OL、闊太、學生捧場，由朝到晚都坐滿人，有望成為港島高檔版澳洲牛奶公司，原是時裝顧問的店主John更明言想進軍IFC。鎮店奶茶的茶膽以錫蘭等五種茶葉溝成，John話：「我個胃唔受得奶茶，試咗百幾杯，最終先溝到這種不濃不淡的紅茶。」除黑白淡奶外亦加入招牌北海道3.6奶，令奶茶比一般茶餐廳多一份香甜，就算不加糖，已經帶有天然的奶甜味。
日本貨無懼毒奶
除了北海道3.6奶，連意粉、通粉都用上日本貨，「對大陸貨無信心，炒蛋、奶茶唔係難做，最重要係做好quality。」雞蛋則從港人在青島開設的農場而來，每兩星期都有檢驗報告，確保不含三聚氰胺。材料靚，環境cozy，但最重要是食物質素。餐廳剛開業時的混亂狀況，小記都見識過，日前再訪，黑面侍應變得笑面迎人，廚房混亂情況也有改善。以後港島居民想食炒蛋飲奶茶，也不用過海去佐敦。
3吋牛奶炒蛋治$20
炒蛋外表乾身，內裏仍有蛋汁，用3.6奶令蛋身更滑溜。
3.6牛奶炒蛋白$35
炒蛋白零膽固醇最啱健康型人，味道清淡無咁膩，可配窩夫或多士。
北海道3.6奶$18/杯
質感濃稠香滑，aftertaste持久，乳香在口中久久不散。
北海道套餐$35
火腿煎蛋牛油多士、叉燒湯意、奶茶，平凡中見真章。用灣仔名牌再興叉燒，日本意粉彈牙。
日本牛奶布甸$28
愛濃濃牛奶味的一定鍾意，甜度較高有點膩，最好兩個人分享。
魚子醬多士$60
John的私房美食，丹麥魚子醬鹹香帶鮮，夾埋鮮牛油令味覺加倍震撼。
北海道牧場餐廳（90986922）
銅鑼灣新會道6-10號京城大廈地下B舖
「澳洲」奶味濃易入口
澳洲牛奶公司的招牌茶餐，柯打後一分鐘內極速上菜，效率之快令人嘆為觀止，味道10年如一日絕無失手，雖然吃得趕頭趕命，又要四個人擠在一張小枱，超滑炒蛋加上鬆軟厚多士卻叫人逼得心甘命抵。奶茶淡奶落得較多，奶味強過茶味，較易入口。
茶餐$28、熱奶茶$14/杯
火腿炒蛋或煎雙蛋、厚多士、叉燒湯意連熱飲。
澳洲牛奶公司（27301356）
佐敦白加士街47號地下
蘭芳園絲襪奶茶之王
蘭芳園創辦人最初想到用棉布袋隔茶，令茶更幼滑，從此奠定殿堂級茶餐廳的地位。奶茶優勝在茶與奶的比例掌握得好，奶味不會喧賓奪主，茶味不澀口，比澳洲牛奶公司的香濃。舊舖門口的茶檔更是中環的地標之一。
下午茶香脆奶油豬仔包配熱奶茶$20、熱奶茶$13/杯
蘭芳園（25443895）
中環結志街2號
《蘋果》讀者免費飲熱奶茶兩日送千杯
《蘋果》讀者憑此剪報優惠券到北海道牧場餐廳，可獲北海道3.6奶熱奶茶一杯，堂食外賣均可。
．只限本周六（4/4）、周日（5/4）早上7點到晚上7點，每日限量500杯，送完即止。
．必須憑報紙剪報才可以享有優惠。影印本或網上列印本無效。
．如有任何爭議，北海道牧場餐廳保留最終決議權，《蘋果日報》概不負責。
