立法會主席曾鈺成裁定仆街唔係粗口，只係非議會用語，毓民噚日發言時打擦邊球，用普通話發言指高官不理市民死活好「不該」，又用英文指香港滿街"poorguy"，雙語廣播，殊途同歸都係玩諧音猛講仆街。
雖然毓民仆街不離口，但既然唔係名正言順，曾鈺成當正耳邊風，其他議員亦無可奈何，民建聯葉國謙甚至讚社民連收斂咗。咁咪好囉，大家各取所需，曾鈺成唔使再做醜人，抵再請社民連食飯。
左校聯署投訴
社民連唔再名目張膽爆粗，左派仍然動員圍剿佢哋，小西灣福建中學學生報料，指校長黃均瑜日前要求全校學生聯署批評爆粗議員，唔簽名就要作文寫「悔過書」解釋，呢位學生認為校方好似洗腦，學生連言論自由都冇。
黃校長否認強迫聯署，又強調並非針對社民連，聯署聲明只係要求議員唔好做出不文明行為，「如果強迫，使乜逐個簽名，我簽晒落去咪得囉！」佢話聯署由教聯會同新界校長會發起，暫時未知有幾多學校、師生聯署，稍後會遞交立法會。