如果寫一本舒夫真高（軍刀）傳記，其中一章係記低佢喺英格蘭球壇嘅得失，隨時已經寫完最後一句。舒夫真高前日為烏克蘭對英格蘭射入一球靚波，一度扳平1:1，本來威番次，可惜佢車路士（佢仲係車仔嘅資產）隊友泰利完場前建功壞佢好事，烏克蘭輸1:2；唔少人估今次可能係舒夫真高，最後一次喺象徵英格蘭足球嘅溫布萊球場獻技，結果都帶住遺憾離開，唉……
後備上陣即入靚波
失意於英格蘭球壇嘅「軍刀」，賽前誓神劈願，話好想喺呢場第6組世盃外入佢個人國際賽第40球，而佢車路士隊友林柏特，賽前揚晒話忌憚呢把「軍刀」，果然，英軍先由高治喺29分鐘接應入波，但下半場初段後備落場嘅舒夫真高喺75分鐘快腳射入，睇嚟呢把「刀」雖然近年喺場邊睇波多過踢波，無用武之地，但都未完全生銹喎。
不過去到完場前5分鐘，碧咸右路斬中，謝拉特用頭二傳，最後由泰利近門射入；碧咸係舒夫真高家陣喺AC米蘭嘅隊友，泰利就係佢踢車路士嘅隊友，新舊隊友呢一夾形成三文治，舒夫真高想威到至奇。
英軍贏波之後形勢大好，同第5組嘅西班牙、第9組嘅荷蘭都係長勝之師，進軍南非只係時間問題；烏克蘭就4戰得7分，仲要同克羅地亞爭崩頭爭取次名。舒夫真高已經32歲，如果打唔入出年世界盃，國際賽生涯都係咁先。
來季前途未卜
再講球會，佢近年無論喺車路士或者外借去AC米蘭都被投閒置散，久疏戰陣，落場都好似踢到40歲咁；佢同車路士嘅合約到出年6月為止，來季車仔到底會唔會回收佢都冇人知，就算回收，亦唔慌重用，佢仲想喺英格蘭球壇發威，睇怕都難咯。