「波，並唔係咁踢嘅！」電影《流浪漢世界盃》裏，孫耀威用騎呢招訓練一班流浪漢出戰足球賽，困難重重又哭又笑，更令老孫頓悟：「遇到問題時一定要撐住，過後你會好欣賞自己當時冇放棄。」用來勉勵親若兄弟的關楚耀一樣得。
福音電影《流浪漢世界盃》昨日上映，改編自真人真事，講述被喻為「香港費格遜」的資深社工吳衞東，如何傾盡所有、幫助一班自比死鹹魚的流浪漢振作、組成曙光球隊參加流浪漢世界盃。從被遺棄的黑暗國度跑進世界焦點，足球令他們重新感受到被尊重及學會尊重自己。
偷雪糕筒練波
孫耀威飾演社工阿東，帶領一班流浪漢包括破產酒樓東主劉以達、因撞死小孩內疚一生的黃德斌、道友黃又南及黑社會林嘉華出戰國際賽，老孫說：「因為阿東冇資金搞隊波，所以用好多騎呢方法，例如偷走雪糕筒練腳法，又攞修路工人嘅夜光衣當球衣，剪開露宿者用嘅紙皮箱做護膝，真係笑中有淚㗎！」
陪着阿東見證人生起跌，孫耀威獲得不少啟發：「人一定會遇到挫折，但你一定要撐住，過後會好欣賞自己當時冇放棄。人哋可以睇死你，但你唔可以睇死自己，如果唔係就玩完。」
勸關楚耀信教
談到藝人形象跟滙控股價一樣，江河日下，孫耀威說：「藝人形象差，有啲係傳媒放大事件，有啲藝人唔爭氣。我當Kelvin（關楚耀）係細佬，今次真係好心痛，希望大家畀機會佢改過。其實我叫過佢返教會，不過佢冇時間。總之我會撐佢，一直為佢祈禱。」
信教逾10載，但孫耀威去年底才受洗，受洗後令他改變了很多：「以前覺得要賺好多錢、好有地位先叫成功，否則我會熬底。家我嘅目標仍然係做全中國最多人識嗰個，但會覺得盡咗力就得，最大成功感就係用自己嘅知名度幫到人，有時我仲會去天水圍做義工傳福音。」
採訪：吳佩思 攝影：仇志中
