香港地，巴士飛站唔算嚴重，我只係身受其害過一次，有晚凌晨3點等巴士返歸，半個鐘一班車，等到腳軟終於見到架N619，司機大佬居然飛站而去，我就眼光光企多半粒鐘！
不過前晚遇到單嘢，就令我多謝另一位飛站司機。話說我喺銅鑼灣排緊隊等客，忽然有兩對夫婦氣急敗壞地衝上車，跟手一位貌似芯姐嘅靚太大嗌：「同我追住前面架巴士！」原來佢哋就遇到巴士飛站，條氣唔順，居然搭的士追車，想截住架巴士，諗住鬧衰個司機。過咗西隧，佢哋喺就近巴士站落車，戰鬥力亦霎時飆升，等住鬧番夠本，點知先發現架巴士完全無影。睇真啲，原來架車根本唔係行西隧！擺晒烏龍怨氣無處宣洩，惟有向荷包出氣，四個人上番的士，豪氣地直入元朗，嗰支旗差唔多成三嚿水，認真要多謝呢位巴士司機囉。話時話，喺馬路上遇着谷氣事又唔知搵乜人投訴，大可參考下面個網址，唔只有齊陸上交通嘅投訴電話，連渡輪顧客熱線都有埋，快快手記落iPhone度，有乜事即刻搵到電話投訴啦。
文：黃師傅
網址：http://hk.geocities.com/abalex208wong/p7.html