英皇鐘錶珠寶（887）噚日派咗份好靚嘅成績表，心情大好嘅董事總經理楊諾思珠光寶氣現身記者會，華華八到楊小姐一身鑽飾加埋接近60萬元，嗰套「StarryNight」頸鏈同耳環，據聞係英皇自主研發嘅產品，有成12.68卡，價值超過24萬元；至於佢右手戴住兩條獨家代理嘅黑白鑽手鏈仲犀利，總共29.49卡，總值35.15萬元。
楊小姐仲話，佢哋已經喺尖沙嘴舊水警基地（星光行對面）原址翻新嘅商場，租咗1.7萬呎作為香港旗艦店，聽聞入面有全亞洲最大、佔地6000呎嘅勞力士商店，仲提供餐飲設施㖭。咁到底幾時開張先？楊小姐就同大家賣吓關子，話到時一定請大家先睹為快喎。