一場金融海嘯，究竟對大家有多大影響？敏妮認識一位公務員朋友，佢一畢業就考到呢份政府工，做咗廿幾年，薪高糧準仲有退休保障，所以每次有其他朋友同敏妮傾理財問題，佢都冇乜興趣。
安穩令人「身痕」
不過，近排佢居然問敏妮有關財務策劃師課程嘅資料，敏妮好奇問：「你唔係想轉工吓嘩？出面風大雨大，難得你有份打風都打唔甩嘅政府工噃！」
可能安定嘅生活真係會令人身痕！的確，呢位公務員朋友係想轉工，但佢唔係想做CFP，而係更加難搵到錢嘅社工。對於佢咁有理想，市儈如敏妮，亦打從心底佩服。至於佢想報讀財務策劃課程嘅原因係肯定自己可以財務自由。
據佢講，即使家唔做轉做社工，亦不愁生計，但一場金融海嘯，即使冇做高風險投資，仍然令唔少人積蓄驟減。最令佢擔心係，唔認識啲投資產品，做咗錯誤嘅投資決定，到時冇得返轉頭，兩頭唔到岸。
早部署留後路
所以佢喺放棄穩定收入嘅同時，一定要確保自己財務自由，唔會受一時嘅經濟環境變化影響。
當然，讀完CFP係咪就等於識得投資，理財策劃好了得，敏妮好有保留。
不過，呢位「身痕」嘅公務員，雖然冇諗過做咗咁耐政府工，究竟可唔可以適應外面嘅社會，但佢總算識得作出人生咁大嘅決定前，先留定後路。就算幾平凡嘅人生，都會有好多轉捩點，凡人未必能掌握自己嘅命運，但能夠早啲部署，總算係對自己負責，對身邊嘅人負責。
溫敏妮
http://wanmanli.com/blogs/