有人說，有了小孩的人就會找少了朋友，我贊同。楊婉儀（Winnie）自從她三年抱兩後，差不多兩年沒與她聯絡，趁住兒童節，便想到找她教大家煮個開開心心兒餐，結果，她不但爽快答應，當天還多了兩個可愛小幫廚！
記者：趙佩倩
攝影：王文忠、梁細權
部份示範：KannisYeung
朱古力收買童心
早上11時來到Winnie屋企，4歲囡囡Hannah和2歲囝囝Jonah以好奇又怕羞的目光看着我和攝影哥哥，幸好我早有準備，帶來朱古力復活蛋收買「童心」，倆小孩笑了，我也放下心頭大石！細佬Jonah更熱情地拖住攝影哥哥，帶他到廚房視察，一盡地主之誼。每當鏡頭對準Hannah，她就會自動擺Pose交足戲，應該是遺傳了媽咪的優良因子吧！
約一個月前，Winnie與仔女一起弄Pizza，一來Hannah喜歡吃；二來可增進親子溝通，結果發現他們很享受製作過程，做好的Pizza亦可當一餐，難怪訪問當天Hannah做Pizza時顯得十分起勁和熟手，儼如一個小廚師。
愛食冬菇及蒸魚
說起仔女的飲食習慣，Winnie謂是兩個極端：「家姐乜都食，鍾意多元化食物，食飯唔使，特別鍾意食酸甜食物，例如肉醬意粉、蝦及牛扒。細佬就較硬頸，正餐唔肯食，點點鬧都無辦法，惟有趁佢睇電視時，不經意餵入佢個口。」很多小朋友都怕吃蒸魚，但Hannah和Jonah就例外，連Winnie都覺得奇怪，「我自己都唔鍾意食蒸魚，但佢哋居然鍾意，蒸魚撈飯就可以做一餐。佢哋好鍾意食冬菇。煮蔬菜時就要切碎收埋喺其他食物入面，等佢哋唔發覺吞埋落肚。」
幫助學習障礙小孩
Winnie自當選慧妍雅集會長後，經常籌備活動，削減陪仔女時間，但她致力為有學習障礙的小朋友籌款，結果獲得外界支持和喚起關注，總算值得呢！
雙重芝士火腿Pizza
0hr10min
製作難度：★☆☆☆☆
Hannah至愛吃又最拿手做的Pizza，Winnie特別買了迷你Size的餅底，他們吃起來就更加啱手形和嘴形啦
材料
迷你薄餅底4塊、番茄醬適量、火腿2塊（切絲）、Mozzarella芝士碎/車打芝士碎各1/2杯
做法
1.將番茄醬均勻地塗上薄餅底。
2.然後撒上Mozzarella芝士和車打芝士碎。
3.鋪上火腿絲，放入微波爐，以大火加熱30秒至1分鐘即成。
貼士
Mozzarella芝士味道較淡，加入車打芝士兩者混和味道最佳。
鮮橙汁冰棒
4hr00min
製作難度：★☆☆☆☆
輪到囝囝Jonah的至愛冰棒，Winnie笑謂每次不可做太多條，皆因他們好記性，會記得吃剩多少，於是會不停嚷着要吃清光為止。
材料
鮮橙5個
做法
1.將4個橙榨成汁備用。
2.餘下的1個橙去皮切粒，拌入橙汁中。
3.將橙汁倒入冰棒模內，冚上蓋，放入雪櫃雪至少3小時至凝固即可。
貼士
用純鮮榨橙汁做出的冰條味道會較淡，可加入適量濃縮橙汁拌勻後才雪凍。
KannisYeung
擅長煮意大利粉、糕點及蛋糕的Kannis，她認為甘笋及肉類對小孩發育特別有幫助，不可缺少，故今天設計了幾款適合小朋友的菜式。
香菇雞肉奄列飯
0hr30min
製作難度：★★☆☆☆
有些小朋友不喜歡吃飯，但只要花點心機在炒飯面做些「小勞作」變成笑面飯，包保佢哋食到清碟。
材料
雞肉80克（切粒）、鮮冬菇4隻、洋葱1/5個、白飯1碗、蛋2隻（拂勻）、茄汁適量、提子乾2粒、鹽適量
做法
1.雞肉切粒，烚熟備用；鮮冬菇及洋葱切粒備用。
2.燒熱鑊下油，炒香洋葱，下冬菇及雞肉炒勻，加白飯炒勻，下鹽調味炒勻，熄火盛起。
3.燒熱鑊下油，下蛋漿煮至七成熟成蛋皮，將炒飯放上蛋漿，熄火後將蛋皮一邊摺起覆蓋飯面後上碟，淋上茄汁及放上提子乾做裝飾即成。
貼士
想蛋煎得滑，可在蛋漿加入少許鮮奶拌勻後才煎。
甘笋南瓜忌廉湯
0hr30min
製作難度：★★☆☆☆
洋葱、甘笋和南瓜粒要炒至聞到香氣才落水煮腍，煮出來的湯會更香。
材料
甘笋1/2條、南瓜1/3個、洋葱1/2個、水550毫升、淡忌廉100毫升、鹽適量
做法
1.將甘笋、南瓜及洋葱切粒備用。
2.燒熱鑊下油，下甘笋、洋葱及南瓜炒香，再下200毫升水煮滾約8分鐘至腍身，熄火後放入攪拌機，攪至茸狀。
3.將350毫升水煮滾，倒入（2）繼續煮5分鐘，下鹽調味拌勻，熄火後倒入淡忌廉拌勻即成。
貼士
忌廉不要太早加入，否則忌廉湯會越煮越嚡口。