晚飯約會上見到陶傑，才子傑食咗一個菜就匆匆而去，問佢為乜咁擒青，佢話臨時有急事，趕住去見一班菲傭同胞喎。
次日又在午飯時間見到佢，於是問佢是否向菲律賓人公開道歉，既然對方出動國會議員，議員一嘈，又令到菲國駐港領事館出聲，如果唔妥協，會唔會搞到有五千菲傭在七月一號上街，令曾特首頭痛呀？
才子傑話唔使操心，佢講得巧妙：「英文博大精深，唔同文化嘅人可能有唔同見解，有好多expats讚我寫得幽默抵死，意有所指，向我讚好；短文其實絕無傷害菲傭嘅意思，只係諷刺財大氣粗，刻薄無良嘅外傭僱主，如果有人誤解而感到受傷害，我深表歉意。」
陶傑直情可以做外交官，詞令無懈可擊。佢原來每個星期在《HKMagazine》寫一篇英文稿，非為曝光，更非為銀紙，只係為咗過癮，唔好丟低佢嘅英文文筆而已，聽講極受外籍人士歡迎，成為皇牌專欄，估唔到呢篇文章竟然被菲人視之為狂熱中國愛國人士，起而攻之，若論愛國情操，中聯辦起碼要向才子傑安慰一番。
才子傑吃午飯又係擒擒青先行鬆人，趕住返中環。佢一起身，左丁山亦醒起有事，於是與主人家蒙公、蒙公子握手而別。蒙公每年春天請傳媒吃蒙氏咖喱飯，李純恩此日乜都唔食，空定個肚食咖喱，認真識貨，左丁山不能食辣，想話退回一碗咖喱，食家薛話：「咪住，不如畀埋我！」食家薛又係食辣專家，吃足兩碗蒙氏咖喱，先至覺得過癮！又係嘅，信興蒙公對咖喱極有研究，年青時在日本跟印度人入廚學習，再經多年經驗改良改進之，喜歡咖喱者，個個讚好！
坐地鐵返到中環，立即走上太子行Dymocks，議員梁劉氏在此推出新書簽名會，書店內擠滿大家閨秀名門太太，齊齊揸住梁太本新書排隊等梁太簽名，書名SophieLeung'sMyFirstBite係一本嬰兒食品cookbook，內有一百款嬰兒食譜，皆梁太精心研究出嚟嘅。余錦基揸住一本，左丁山問佢會唔會親自下廚，為孫兒炮製，余錦基騎騎笑話：「會好食過我做細路時食嘅飯仔啩！」