T富商三奶李姿霆（Karen）早前搭上港男黃長發，即被T富商閂水喉，每月8萬元的包養費馬上斷纜。不過Karen和男友有情飲水飽，前日二人拍拖也只齋逛商場，開餐則選擇去大角嘴喫麪，埋單70元，勁慳家。事後黃長發稱下周將上班做會計文員賺錢養女友，至於Karen女兒的生活則應由T富商負責。
黃長發和T富商三奶李姿霆的姊弟戀擾攘個多月，至早前T富商與Karen劃清界線後，風波才逐漸平息。Karen辣㷫T富商即被經濟封鎖，每月的8萬元包養費也化為烏有。
逛圓方齋睇唔買
面臨坐食山崩的Karen，寧願由富婆變慳妹，也要攬住黃長發過人世。前日她與男友齊以牛記笠記情侶裝打扮，拍拖逛圓方商場，但兩人齋睇沒幫襯，逛足大半天才牽手到停車場取車，由男方駕駛胞兄黃長興的車，載女友到大角嘴喫麪。
抵埗後，黃長發將車輛違例泊街，繼而與女友走進棠記麪食店開餐，分別叫了一碗豬手麪及雲吞麪，其後再叫了一碗淨雲吞兩份食，且淨飲茶連汽水奶茶都慳番。雖然品嚐的只是平民餐，但兩人吃得開心，邊食邊講邊笑，Karen吃菜時津津有味，偶然還望着男友流露深情笑容。
反而黃長發不時四圍望觀察環境，又以蚊聲與女友交談，但隱約聽見兩人曾提及彼此家人。約半小時後喫麪完畢，由男方畀錢，埋單約70元，接着二人各自揸車返家。
有指黃長發本月將於一間法資公司出任會計文員，他昨在電話中表示將在下星期上班，他說：「早排哥哥誤會我冇會計師牌，其實我有考到，之前喺法國考嘅，所以今次特別搵番法國公司工作，我個牌係認可嘅。」
嘆藝人表面風光
黃長發在無綫月薪約8,000元，問他轉工後收入如何？他說：「咁多過做藝員，無綫之前雖然畀好多機會我，但真正收入唔多，做藝人係表面風光，實質開支好大，家做番普通人仲簡單同輕鬆。」黃長發又強調並非貪Karen錢才相戀，他說：「Karen嘅錢係用嚟使喺佢囡囡身上，根本冇同我share。」
黃長發又稱早前曾與Karen去泰國旅行，他說：「我哋感情穩定咗，家希望搵多啲錢，畀自己同身邊人有好嘅生活。」對於T富商對Karen閂水喉，黃長發說：「富商始終係BB女嘅爹哋，佢有責任養個女。」
採訪、攝影：娛樂突發組